CEBU, Philippines - Ang Cebu City Sports Commission (CCSC) ubos sa liderato ni Commissioner Lorenzo ‘Chao’ Sy mopadala og upat ka Sugbuanong bilyarista alang sa WPA World Pool 10-Ball Championships 2015 ug sa 3rd MP Cup International 10-Ball Doubles sa Pebrero 17-26 didto sa SM City-General Santos.
Mokabat sa 128 ka mga top billiards players sa tibuok kalibotan ang mosalmot sa maong torneyo diin ang kampiyon makadawat og P40,000.
Ang WPA World 10-Ball Championship himuon unya sa Pebrero 17-21 samtang ang MP Cup International 10-Ball doubles pagahimuon unya sa Pebrero 17-26.
Sa upat, sila lang duha ni Cebuano cue artistsRuben Cuna ug Boots Agusto ang awtomatik nakakuha’g pasaporte sa qualifying round didto sa Manila.
Ang 2015 Sinulog Cup champion Anton Raga ug Eljun Abellana mopailawom pa og elimination uban sa mga langyaw nga billiards players sa Pebrero 15-16.
Ang mga Sugbuanong billiards players kuyogan sa ilang biyahe ngadto sa Gensan ni Allan Cortes, ang tag-iya sa Jancor Billiards Center sa dalan Manalili, ning siyudad. (BANAT NEWS)