CEBU, Philippines - Ang Purefoods Star Hotshots mosugod na og baktas sa halapad nga dalan paingon sa ilang title retention sa PBA Commissioner’s Cup.
Ang Purefoods makigharong sa GlobalPort Batang Pier sa main game karong alas-7 sa gabii didto sa Cuneta Astrodome.
Sa pasiunang duwa nga gitakda sa alas-4 sa hapon, ang Kia Carnival makigsangka batok sa Meralco Bolts.
Ang Purefoods mag-atubang hinuon og dakung hagit tungod kay anaa kanila ang labing mubo nga import nga si Marqus Blakely nga adunay gitas-on nga 6-foot-5, mas mubo itandi sa 6-foot-9 center nga si CJ Leslie sa Batang Pier.
Si Blakely mao una ang moserbisyo sa Purefoods samtang nagpaabot pa sila kun kanus-a makaduwa uban sa koponan ang 6-foot-9 ex-NBA bigman nga si Daniel Orton.
Ang GlobalPort laraw nga mokulit sa ilang ikaduhang sunod-sunod nga daog human nila gipilde ang Kia niadtong Martes sa iskor nga 100-89. (BANAT PALARO)