CEBU, Philippines – Ang ika-16 nga edisyon sa tinuig nga Sinulog Open National Bowling Tournament gikatakda karong Enero 19-25 diha sa Gaisano Bowlingplex sa Banilad, ning dakbayan.
Mga kategoriya nga kumbatihan mao ang singles, doubles ug team ug ingon man ang masters event.
Matag koponan langkuban og tulo ka miyembro sa bisa’g unsang kombinasyon, usa ka lalaki ug duha ka babaye o di ba duha ka lalaki ug usa ka babaye.
Ang masters event langkuban sa top 48 bowlers human sa unom ka qualifying games apil na niini ang tagurha ka duwa sa team, doubles ug singles. Magtakus sila ubos sa usa ka 10-game series.
Ang Bowlingplex Tenpin Association (BTA) nga maoy nag-organisar sa maong torneyo, mohatag og ganting salapi sa nag-unang tulo ka mananaog sa doubles, singles ug all-events, ug ingon man sa top 9 finishers sa masters class. Aduna espisyal nga ganti nga madawat ang top three sa senior citizen ug sa ladies division.
Apan giambisyon sa tanan mao ang P50,000 nga ihatag sa partisipante nga makaposte og perfect game. (BANAT NEWS)