Rain or Shine naka-eskapo sa sikit nga duwa batok alaska

CEBU, Philippines - Naka-eskapo ang Rain or Shine Painters sa ilang kulbahinam nga duwa batok sa Alaska Aces, 98-95 sa 2014 PBA Philippine Cup kagabii didto sa Smart  Araneta Coliseum.            Gumikan niini, ang Painters mao na ang mi-okupar sa ikaduhang dapit sa standing uban ang 8-2 nga baraha.  Ang Aces  nalabay  sa ikatulong dapit sa 8-3 win-loss record.

Daku og purohan nga makuha sa Painters ang    automatic semifinals berth sa playoffs.

Init ang duwa tali sa duha ka powerhouse teams, apan ang Alaska maoy nakabintaha  sa halftime, 45-42  sa tira ni JV Casio.

Kontrolado sa Alaska ang opensa sa paningkamot nila ni Vic Manuel, RJ Jazul ug Dondon Hontiveros  aron inaton ang labaw ngadto sa 76-69 sa katapusang dos minutos sa third period.

Apan sa final period, mihimo na usab sa ilang gikalisangang final period rally ang mga batos ni coach Yeng Guiao ug natabla ang iskor , 93-all human sa tres ni Paul Lee sa katapusang 33 segundos sa duwa.

Nakahimo  og mga krusyal nga sayop ang Alaska sa daginutong segundos nga gipahimuslan sa Rain or Shine.  Ang tira nila ni Jervy Cruz ug Jeff Chan maoy mikandado sa daog alang sa Painters.