CEBU, Philippines - Moabot ngadto sa 100 ka tennis players ang mopakita’g aksiyon sa penultimate leg sa Cebuana Lhuillier Age-Group Tennis Championships ugma nga ipahigayon sa duha ka managlahing binyu sa City Green Tennis Resort sa Barangay Punta Princesa ug sa Alta Vista Golf and Country Club sa Pardo.
Ang mga talento sa Sugbo manalipod sa ilang balwarte batok sa mga bisitang magduduwa gikan sa Zamboanga, Tubod, Ozamis, Cagayan de Oro, Marawi, Siquijor ug Dumaguete.
Mga kategoriya nga tigian sa Group 3 Philippine Tennis Association (PHILTA) sanctioned event mao ang mixed 10-under, boys ug girls, 12, 14, 16 ug 18 under.
Ang finale sa 28-leg series himuon sa Disyembre 26-30 didto sa Camp Aguinaldo Tennis Club sa Quezon City.
Niadtong interesado nga mosalmot sa tulo ka adlaw nga kompetisyon gihatagan lamang kutob karong alas-5 sa hapon sa pagparehistro.
Alang sa dugang mga pakisayod, mahimong mokontak ni Mario Craiz sa 0920-946-8280. (BANAT NEWS)