Adlawan, Abellar hawod sa 6TH leg SA MS motosuit moto-x series

CEBU, Philippines - Gisaw-an nila ni multi-titled Cebuano rider Jon-Jon Adlawan ug Venil Abellar ang labing taas nga dungog sa sixth leg sa 2014 MS Motosuit Motocross Series nga giulohan og 5th Mayor Nice Apura Invitational Motocross niadtong Domingo didto sa Brgy. Valladolid, dakbayan sa Carcar.

Tataw na kaayo nga makuha ni Adlawan ang “Rider of the Year” award human siya maghari sa expert open division batok ni Dondon Yuson, samtang si Abellar nalandig sa ikatulong dapit.

Hinuon, si  Abellar mibawos ngadto ni  Adlawan aron masakmit ang prop open title. Si Winsor Famorca sa Guimaras Island nitugpa sa ikatulo.

Wala sab magpabitin silang JP Cuesta, Jed Luna, Clinton Gualiza, Jougie Basco ug JB Bacabac dihang nanghawod sab sila sa tagsa-tagsa nilang dibisyon. Si Cuesta maoy hari sa open enduro, si Luna nidominar sa local enduro, si Gualiza mihawod sa beginners open production, si Basco sa novice open, samtang si Bacabac sa intermediate open.

Sa iyang bahin, si Flores mihakop og duha ka runner-up trophies pinaagi sa novice open ug intermediate open.

Ang beteranong si Pepo Rubi mikawat sab og salida dihang iyang nasakmit ang executive A title, samtang sila si James  Doroy ug Nonoy Reluya nidominar sa executive B ug C.

Lain pang category winners naglakip nilang BJ Pepito (mini 85cc), Alfonso Castañares (mini 50cc), Lloyd Abrenica (mini 65cc), Marial Villafuerte sa ladies open) ug Charise Lauron (ladies 12-below).

Ang amahan ni Charise nga si Amy Lauro maoy nanghawod sa exclusive category alang sa mga molupyo sa Carcar. Si Rudy Nadela miokupar sa ikaduha, gisundan ni Zoy Zabala.

Si Lorenzo Zordan naghari sab  sa underbone race. Si Willy Borcer mipahiluna sa ikaduha, samtang sila si John Ellen, Welmar Zaldi ug Imok Taruna maoy mikompleto sa top five sa maong kategoriya.

Ang usa ka adlaw nga lumba nagmalampuson tungod sa gibubo nga suporta  sa  dakbayan sa  Carcar ubos sa liderato ni Mayor Nice Apura uban sa Narra Park Resort  sa  Alcoy, CTM-Media Inc., Jonadel’s Inns and Suites, Canoy’s Canyon Estate, CCSC Construction, Outlast Bikers, Barangay Captain William Racoma, Geraldine

Ybañez ug Amy Lauron sa Lauron Air Conditioning. (BANAT PALARO)