CEBU, Philippines – Mikulit og 4-1 nga kadaugan ang Philippine Azkals kagahapon batok sa upset-conscious nga Laos national team atol sa pagbukas sa AFF Suzuki Cup 2014 didto sa My Dinh Stadium sa Vietnam.
Una untang nakaiskor ang Laos apan wala makurat ang Azkals kinsa midominar sa duwa ug maoy mihimo'g sagunson nga upat ka goals gikan nilang Simone Rota (40’), Phil Younghusband (45+1’) ug ni substitution Patrick Reichelt (76’ ug 88’) aron pagsakmit og tres puntos alang sa Group A.
Matud pa sa bag-ong coach sa Azkals nga si Thomas Dooley "It’s important to start the tournament by winning the first game. When we got the first goal, we looked okay.”
Ang maong kadaugan matud pa ni Doley nga maoy maghatag kanila'g dakong kumpyansa ugmang adlawa dihang ilang ikasangka ang Indonesia.
Gikontrolar sa Azkals ang possession gikan sa kick off apan wala dayon makaigo sa ilang target ug nakahigayon lang sa pag-iskor sa ika-21 nga minuto sa duwa.
Ang foul ni Juani Guirado maoy naghatag kang Khampeng Sayabuth nga makahimo'g maanindot kaayong free kick ngadto sa wa'ng eskina aron makaiskor dayon ang Laos ug medyo nakalitan ang Azkals.
Apan dihang mihimo'g atake si Jerry Lucena didto sa midfield, nakaiskor sab dayon ang Azkals gikan sa goals nilang Rota ug Younghusband aron taposon ang first half sa 2-1 nga abante.
Sukad sa 2010 AFF Suzuki Cup, nagkaumento ang matang sa duwa nga gipakita sa Philippine Azkals nunot sa dakung paglaum ug bug-at nga pressure gikan sa mga fans.
“There’s always pressure to win a tournament. Ever since 2010, people think we can go on and win the World Cup,” miangkon ang Azkals skipper nga si Rob Gier. (BANAT NEWS)