CEBU, Philippines - Tam-is nga kadaogan ang nasakmit sa CEI ni team owner Wiljohn "Sugar" Camay human ilang gilubong ang Avenido Brokers sa iskor, 99-86 kaniadtong Lunes atol sa nagpadayon nga 3rd season sa BOC-CIPU Friendship Cup basketball tournament didto sa barangay Tinago gym, ning dakbayan.
Sa laing duwa, midaog sab ang MP Brokers ni team owner Marty Pimental batok sa Ynah Brokers, 99-82.
Gitapos sa CEI ang elimination round sa ilang 4-7 nga baraha ug sila maoy nakakuha sa ikawalong pwesto diin aduna sila'y twice-to-beat advantage sa mahimong no. 9 seed nga wala pa hisayri karon. Ang CEI ug ang Avenido Brokers (2-9) ang wala nay duwa sulod sa 12 ka teams.
Ang top four sa maong torneyo awtomatik nang moabante ngadto sa quarterfinals.
Ang kanhi player sa USP Panthers nga si Philip Munez maoy nangu sa CEI sa iyang 24 puntos samtang igo lang nakahimo'g singko puntos si Camay.
Sa laing duwa, miburak og 35 puntos ang speed demon nga si Beking Rollon ug midugang si Janus Abellana og 19 puntos alang sa MP Brokers (7-3) kinsa wala damhang mikatkat na ngadto sa ikatulong pwesto gikan sa 0-2 opening ug sa 2-2 sa sayong bahin sa torneyo.
Si Eric Carmen maoy nangu sa Ynah Brokers (6-3) sa iyang 12 puntos ug bugtong siya lang maoy adunay double figures sa ilang team. (BANAT NEWS)