CEBU, Philippines - Gipakita sa University of the Visayas Green Lancers ang ilang kabangis ug ilang gipaila nga sila ang “winningest” collegiate ballclub dinhi sa Sugbo dihang gipakuratan nila ang UAAP reigning champion National University Bulldogs, 77-74 sa Philippine Collegiate Champions League (PCCL) Elite Eight Series-Cebu Leg kagahapon didto sa Cebu Coliseum.
Halos dili magdungog ang kasaba sulod sa Cebu Coliseum tungod sa mga hugyaw sa UV fans atol sa paghuni sa final buzzer.
Walay usa nga nagtuong modaog ang Lancers sa Bulldogs, kinsa maayo kaayong modepensa ilabi na naglabaw sila’g 17 puntos, 32-15 sa tunga-tungang bahin sa second period. Gisugdan sa Lancers ang third period og 7-0 run ug laing 15-4 run ang ilang gipabuhagay aron tapuson ang third period ngadto na lang sa kuwatro puntos, 53-57.
Napatabla ni Rhaffy Octobre ang duwa, 67-all ug ang follow-up ni John Michael Abad gikan ra sab sa iyang sipyat naghatag sa Lancers sa una nilang labaw, 69-67 sa nahabiling 4:06 sa duwa.
Giinat sa Lancers ang ilang labaw ngadto sa kuwatro puntos sa basket ni Francisco Arong, 71-67.
Mao kadto ang unang daog sa Lancers ubos sa bag-o nilang coach nga si Gary Cortes.
Si Abad maoy nangu sa Lancers sa iyang 18 puntos, si Aron miamot og 17 puntos, samtang midugang og 15 puntos si Cedrick Akomo.
Ang Bulldogs gipangulohan ni Rosario sa iyang 16 puntos. (BANAT NEWS)
Puntos matag usa
UV (77) – Abad 18, Arong 17, Akomo 15, Segumpan 8, Codilla 7, Octobre 7, Aguirre 4, Santillan 2.
NU (74) – Rosario 16, alolno 14, Aroga 13, Khobuntin 9, Diputado 7, Clda 5, Betaynene 4, Neypes 4, Perez 2.