CEBU, Philippines - Gikanlat sa SAC ang katapusang lingkoranan sa finals human modaog batok sa BPSO, 61-50 sa Inter-staff division sa 4th Palarong Pambarangay basketball tournament niadtong Huwebes sa gabii didto sa Teleof basketball tournament sa Brgy. Subangdaku, Mandaue City.
Sa maong kadaugan, ang SAC maoy nakakuha og katungod sa pakigsakbang sa nagpaabot nga PNP Station 2 sa kampiyonato nga gitakda sunod semana.
Ang “Big Three” sa SAC nga silang Richie Tecson, Dodod Colina ug Eric Plazo maoy responsabli sa kadaugan. Si Tecson mikulit og 19 puntos, gisundan ni Colina sa iyang 16 puntos ug Plazo nga adunay 11 puntos.
Sila si Joel Dublin ug Zaldo Montayre mao sab ang nangu sa BPSO nga parehong mikapkap og 17 puntos, gisundan ni Lester Noel sa iyang 14 puntos.
PUNTOS MATAG USA
SAC (61) – Tecson 19, Colina 16, Plazo 11, Carido 6, Perez 6, Maloloy-on 3.
BPSO (50) – Dublin 17, Montayre 17, Noel 14, Colina 3. (BANAT NEWS)