Polog buhi pa, Casili abante sa SK finals
CEBU, Philippines – Gilubong sa barangay Polog ang “twice-to-beat” Lanipga, 73-56 aron mapugos ngadto sa “rubbermatch” sa Inter-Barangay Category B championship sa Mayor Teresa P. Alegado Cup 2014 Fiesta Basketball League didto sa Tayud gym.
Ang Polog cagers wala mohatag sa Lanipga og higayon nga makalabaw human sila moposte’g 20-12 sa first period.
Misikit ang Lanipga sa iskor nga 50-51, apan ang Polog milusad og 22-6 nga rally aron maangkon ang 17 puntos nga kadaugan.
Sa SK division, ang Casili miiskor og 66-56 nga kadaugan batok sa Pulpogan aron moabante sa “best-of-three” finals series batok sa Jugan o di ba sa Garing.
Miulbo dayon ang kainit sa Casili aron molansang og 22-13 nga bentaha, apan nagguba ang ilang duwa sa second period hinungdan nga nailog sa Pulpogan ang labaw sa halftime, 36-32.
Hinuon, ang Casili nakarekober sa sunod nga kuwarter aron ilogon pagbalik ang labaw, 51-47 ug sila na ang nidiktar hangtod sa katapusang gutlo sa duwa.
Ang usa ka bulan nga torneyo nga usa sa mga highlights sa tinuig nga kapistahan sa Consolacion pahinungod sa ilang mahal nga patron San Narciso, gipaluyohan ni Mayor Teresa P. Alegado, Vice Mayor Rey Damole ug sa tanang sakop sa Sanggunian Bayan. Si Councilor Nilo Ferraren maoy sports committee chairman sa abag ni Boy Tibon ug Association of Barangay Council President Marilou P. Casul.
Ang mga duwa gidumala ni sports commissioner Paul Alelu Q. Flores, ang kanhi varsity sa Far Eastern University (FEU). (BANAT NEWS)
- Latest
