CEBU, Philippines - Hinugtanay sa bakus ang mahitabo sa duwa tali sa magkaribal -- Southwestern University (SWU) Cobras ug University of San Carlos (USC) Warriors alang sa 2-1 lead sa “best-of-five” finals series sa 14th Cebu Schools Athletic Foundation Inc. (CESAFI) basketball tournament karong gabii diha sa Cebu Coliseum.
Ang SWU-USC mag-abot sa alas-6:45 sa gabii human sa duwa tali sa Univesity of the Visayas (UV) Green Lancers ug University of San Jose-Recoletos (USJ-R) Jaguars nga importante sab alang kanila ang kadaugan aron makaangkon og lingkoranan sa Philippine Collegiate Champions League (PCCL) Sweet 16.
Krusyal ang Game-3 tungod kay ang modaog karong gabii adunay dakung purohan nga mokampiyon.
Ang Cobras maoy unang mitukob og daog, 59-55, apan ang Warriors nakabawos sa Game-2, 53-46 aron magtabla ang series, 1-1.
Makita sab karon kun unsang matang sa adjustments ang himuon sa matag habig.
Ang Cameroonian reinforcement nga si Shooster Olago nagpabilin nga labing hait nga hinagiban sa opensa sa Warriors. Ang All-Star MVP makanunayon sab sa iyang maayong duwa, sa opensa ug depensa nga maoy naghatag labad sa ulo sa Cobras.
Tungod sa ilang maayong depensa, wala hatagi sa Warriors og higayon nga makahuygo ang mga sinaligan sa Cobras sama nilang Jovanie Luz ug Mark Jayven Tallo.
Ang laing langyaw’ng magduduwa nga si Espoir Toyambi mipakita sab og impresibong duwa, mao sab ang local players sama nila ni Charles Pepito, Victor Rabat, Keifer Lim, Nico Magat ug Christian Laude ug uban pa.
Sa habig sa Cobras, itugyan ni coach Raul ‘Yayoy’ Alcoseba ang iyang pagsalig ngadto sa ilang imports nga silang Landry Sanjo ug Bendley Valdor. Apan nagkinahanglan sab kini og suporta gikan sa mga lokal Bernie Bregondo, JC Parker, Mike Holper ug Adam Mohammed.
Ang Game-4 gitakda karong Sabado, samtang ang Game-5 kun kinahanglan duwaon sa Domingo. (BANAT NEWS)