CEBU, Philippines - Nakatabla ang Goldberry Ilo-ilo Hotel ug ang RDAK Transporters sa ilang championship games sa managlahing division sa The Avenir’s Cup SHAABAA Season 19 basketball tournament aron ihatod ang best-of-three series ngadto sa rubbermatch niadtong Huwebes sa gabii didto sa Sacred Heart School Old Campus gym sa General Maxilon Avenue, ning dakbayan.
Ang Golberry Ilo-ilo milubong sa Cebu Landmasters, 74-55 sa Division A, samtang ang RDAK mipukan sa Chick@Phil 89 sa iskor nga 50-41 sa Division B.
Ang rubbermatch duwaon karong adlawa didto sa SHS-AdC Magis Eagles Arena sa barangay Canduman sa dakbayan sa Mandaue.
Si Justin Huang maoy nangu sa Goldberry sa iyang 24 puntos, gisundan ni Robert Gilo nga adunay 17 puntos. Sila si Dave Lim ug Jeremy Huang mitampo’g 11 ug 10 puntos matag usa.
Ang Cebu Landmasters gipangulohan sab ni Kyle Valmoria, kinsa miposa’g 13 puntos. Nakakuha sab siya’g suporta gikan nila ni Alexander Lim ug Christopher Consunji nga miamot og 12 puntos matag usa.
Sa Division B, si Charleson Sia mikamada og 14 puntos aron pangulohan ang RDAK Transporters samtang si Cecilio ‘Boylit’ Gillamac III miratsada’g 10 puntos.
Sila si Theogene Lim ug Chad Go maoy topscorers sa Chick@Phil 89 nga parehong miiskor og 10 puntos. (BANAT NEWS)