CEBU, Philippines - Nakaipsot ang University of the Visayas (UV) Baby Lancers batok sa University of San Jose-Recoletos (USJ-R) Baby Jaguars, 57-53 nga didto lang magligas sa daginutong oras aron moabante sa semifinals sa 14th Cebu Schools Athletic Foundation, Inc. (CESAFI) kagahapon didto sa Cebu Coliseum.
Sa laing duwa, buhi pa sa ilang kampanya ug nakapugos og playoff ang University of Southern Philippines Foundation (USPF) Baby Panthers human ilang gipukan ang University of San Carlos (USC) Baby Warriors, 57-47.
Adunay mahitabong playoff karong adlawa aron pagsuta kun kinsa sa Baby Panthers ug sa Baby Warriors ang moabante sa semis aron makig-uban sa nagpaaabot nga Sacred Heart School-Ateneo de Cebu (SHS-AdC) Magis Eagles, Cebu Institute of Technology-University (CIT-U) Wildkittens ug Baby Lancers.
Si Orlan Wamar maoy topscorer sa Baby Lancers nga mikulit og 14 puntos, samtang si Abdillah Guro mao sab ang nangu sa napildeng Baby Jaguars sa iyang 13 puntos. Sila si Richmon Lapinid ug Austine Rome Mutya parehong adunay 12 puntos.
Sa laing bahin, walay nakapugong kang Ain Obenza, kinsa mihipos og 10 sa iyang 23 puntos didto sa third period aron pangulohan ang Baby Panthers.
Bugtong si Jean Jacque Antigua lang ang player sa Baby Warriors nga miiskor og double figures pinaagi sa iyang 15 puntos.
Ning pagsuwat, nagpadayon pa ang sangka sa Southwestern University (SWU) Cobras batok sa Jaguars alang sa ikaduhang luna sa finals. (BANAT NEWS)