Philip Angelo Leonardo guest karon sa Ms Motosuit TV special

CEBU, Philippines - Ang batan-on apan masaarong rider gikan sa Ozamiz City maoy molugwa sa ikapitong episodesa MX-RLS (Motocross Rider Life Story), ang bag-ong segment sa MS Motosuit Motocross TV series nga makita sa CCTN 47 karong adlawa gikan sa alas-10 hangtod sa alas-10:30 sa buntag.

Si Philip Angelo Medina Leonardo mopaambit sa iyang mga kasinatian ug pasundayag sukad siya nagsugod sa lumba  sa  otso anyos pa siya.

Ang 13-anyos nga si Leonardo mahigugmaon sab og basketball, biking ug swimming ubos sa landong sa Leonardo Racing Promotions (LRP) Medina College Racing Team.

Si Leonardo nidaog sa iyang unang mini 85cc category championship didto sa Lanao del Norte. Nisalmot sab siya sa Kopiko Supercross Series, ingon man sa lumba didto sa Bicutan nga gipasiugdahan sa National Motorcycle Sports and  Safety Association.

Damgo ni Leonardo nga mahimong pro ugma damlag ug molumba sa ubang nasud.

Ang senemanang TV special maoy bag-ong proyekto ni MS Motosuit big boss Lou Ornopia.