CEBU, Philippines- Wa kauyon ang Smart Gilas Pilipinas sa nakita nilang ngil-ad nga tawag gikan sa mga referee nga gitudlo nilang rasun sa ilang sikit nga overtime nga kapildehan batok sa Croatia niadtong Sabado, 78-81, sa FIBA World Cup didto sa Spain.
Si Gilas point guard Jayson Castro nagkanayon nga dili makaangyon ang 'flopping' nga gitawag sa referee kaniya atol sa krusyal nga bahin sa duwa.
Si Castro gisungog sa usa ka player sa Croatia, apan inay nga tawgan og offensive foul, si Castro na hinuon ang gisagpa og technical tungod sa pagtuo sa referee nga gipeke niya ang foul. "Sinuwag nga ako," matud pa ni Castro sa The Philippine Star.
Miingon si Castro nga imposible nga iyang gipeke ang iyang foul tungod kay hangtud ning tungura nagsakit pa ang iyang dughan human gidumbol sa higanteng Croatian.
Sa iyang bahin, si Gilas coach Chot Reyes dismayado sa mga tawag sa referee tungod kay daku iyang pagtuo nga ilaha na untang ang daog kun natarung lang kini og tawag.
“The refs called a technical foul that I couldn’t believe. The refs said Jayson was flopping. The guy is 5'10 and he’s guarding a 6'5, how can that be a flopping?” matud pa ni Reyes.
Ang Gilas sunod makigsangka sa laing power-house nga Greece sa Lunes sa kadlawon diin gipaabot nga subling ipakita sa national team ang ilang kaisug batok sa laing lig-ong kontra.
Sa laing bahin, nakadawat og pagdayeg gikan sa Palasyo sa Malacañang ang Smart Gilas Pilipinas national team human sa ilang isug nga pakigsangka sa European power-house nga Croatia diin sila napilde og tres puntos, 78-81, sa FIBA World Cup didto sa Spain.
Sa usa ka Palace statement, ang tibuok Malacañang uban ni Presidente Benigno Aquino III sa pagpadayag sa ilang dakung bilib ngadto sa national team nga diriyot mihimo og dakung upset batok sa Croatia.
"Nakiisa ang Pangulo sa buong sambayanan sa paghahatid ng pagbati sa ipinakitang galing at determinasyon ng ating mga manlalaro ng Gilas Pilipinas sa kanilang laban kontra Croatia," matud pa sa gipagawas nga Palace statement.
Una nang miingon si Aquino nga ang FIBA World Cup mahimong taytayan alang sa mga Pinoy nga ipakita ang ilang abilidad ug talagsaong determinasyon sa tibuok kalibutan pinaagi sa basketbol. (LPM gikan sa ABS-CBN News) (BANAT NEWS)