Rosarians mopasiugda’g Fun Run

CEBU, Philippines - Ang Holy Rosary School, usa sa labing karaang catholic schools sa Sugbu mopahigayon sa ilang 1st Rosarian Fun Run karong Agosto 30 nga manukad ug matapos sa ilang school campus ground sa Poblacion Pardo, ning siyudad.

Magsilbe kining opening salvo sa maong tunghaan sa ilang pagsugat sa ilang 50th or  golden jubilee anniversary sunod tuig. Gawas pa  niini, tuyo usab sa maong kalihukan nga matapok ang mga alumni sa HRSP ilabi na kadtong  atua sa abroad.

Dul-an sa 2,000 runners ang gipaabot nga modagan sa maong fun run, usa ka fund-raising event alang sa pagpatukod sa Jubilee building nga dugang sa ilang tunghaan alang sa  Grades 11 ug 12 nga buksan nunot sa pagpatuman sa  K to 12 program sa DepEd.

Mga kategorya nga tigian naglakip sa 100m dash alang sa grade 4 ngadto sa kinder students ug 1K ug 3K alang sa ubang tinun-an, faculty ug alumni. Bukas usab kini alang sa mga amateur runners.

Niadtong interesado, mahimong magparehistro sa Holy Rosary School of Pardo. Sa dugang mga pangutana  kontaka ang 273-1915 o bisita sa ilang facebook page. Holy Rosary School-Pardo.  (BANAT NEWS)