CEBU, Philippines- Naghari na sab ang Cebuano teen riding sensation nga si Jon-jon Adlawan dihang iyang gilangkat ang pro open title sa Minglanilla leg sa Man and Machine Supercross series didto sa Adlawan racetrack sa Lipata, Minglanilla.
Si Adlawan, kinsa midaog sa Badian leg sa miaging semana, subling mipakita sa iyang abilidad aron mapilde niya ang karibal ug Mindanao rider nga si Rhowell Mangosong, kinsa mipuwesto sa ikaduhang dapit, samtang laing Cebuano rider nga si Jubenile Abellar mi-okupar sa ikatulong dapit.
Gawas sa pro open, gisakmit usab ni Adlawan ang pro lite title batok gihapon ni Mangosong. Si Clinton Gualiza midaog sa local enduro title, samtang si Esrael Larido sa underbone title.
Giharian ni Jacob Orbe ang intermediate class batok nila ni Ted Conde ug John Flores nga mipahiluna sa ikaduha ug ikatulo nga dapit, samtang si Pepeng Mar maoy hawod sa beginners class.
Lain pa nga mga category winners mao sila si JB Bacabacsa (novice), Pepo Rubi (veterans A), Elton See (veterans B), Roscel Gungob (veterans C), Donkey Sanchez (open enduro) ug Shawn Timothy Peralta (peewee).
Ang maong lumba gisuportahan sa Kopiko Astig 3-in-1, Natures Spring, Jela Construction, Rusi Motors, Tridharma Inc. (BANAT NEWS)