CEBU, Philippines- Naghari na sab ang Germany sa kalibotan sa football human sa ilang 1-0 nga kadaugan batok sa karibal nilang Argentina kagahapon didto sa Maracana Stadium sa Rio de Janeiro, Brazil.
Ang bench player nga si Mario Goetze maoy bayani sa Germany dihang gipalusot niya ang game-winning goal sa 113th minute nga maoy milaksi sa kasingkasing sa mga Argentinian fans.
Mihimo sab og kasaysayan ang Germany isip labing una nga European team nga midaog og World Cup nga gipahigayon sa South American.
Kini ang ikaupat nga World Cup title nga nakuha sa Germany
Katapusang mikampiyon sa World Cup ang Germany niadto pang tuig 1990. Midaog usab sila sa World Cup niadtong tuig 1954 ug 1974.
Nahimong dominanteng puwersa ang Germany sa World Cup ilabi na sa semifinals diin mikulit sila'g makasaysayanong 7-1 nga kadaugan batok sa host Brazil.
Apan nasukod ang abilidad sa mga German batok sa South American powerhouse nga Argentina nga milisudlisod kanila pagpasulod og goal hangtod sa katapusang mga minutos sa duwa.
Gawas sa Argentina, lakip sa mga biktima sa Germany sa World Cup mao ang Portugal, USA, Nigeria ug France.
Sa laing bahin, sakit ang kapildihan alang sa Argentina nga gipaabot unta nga mosakmit sa ilang ikatulong titulo. Gihikawan usab sa Germany og kampiyonato ang football star nga si Lionel Messi. (BANAT PALARO)