Toledo City mo-host sa 3rd leg sa MS Motosuit race

CEBU, Philippines -  Nagpanikad na ang mga tang-ang riders lukop nasud sa pagpakita sa ilang katakus dihang mag-abot sila pag-usab sa  third leg sa 2014 Motosuit Motocross Series nga uloha'g "1st Toledo City Motocross Cup" ugma, Hunyo 2 didto sa Looc II sa  barangay Bato, Toledo City.

 Naglaum na sab si MS Motosuit big boss Lou Ornopia og laing makapaukyab nga aksiyon gikan sa mga dekalibreng riders tibuok nasud human sa  malampusong duha ka legs didto sa Calambua sa San Remigio ug sa Lugo, Borbon sa amihanang bahin sa Sugbu.

 "For sure, it's going to be another highly entertaining motocross action," matud pa ni Ornopia.

 Lakip sa mga kategoriya nga banatan mao ang mini 60cc. ug 85cc., beginners, local enduro, open enduro, executive A, B ug C, novice, intermediate, expert ug pro open.

 Human sa Toledo, ang fourth leg ning unom ka bahin sa series dad-on didto sa Dinagat Island sa Surigao sa Hunyo 18.

 Sa laing bahin, ang aksiyon nga motocross show makita sa CCTN 47 matag Sabado sa alas-10 hangtod sa alas-10:30 sa buntag ug ang replay niini makita matag  Domingo gikan sa alas-10 hangtod sa alas-10:30 sa gabii.

 Ang tunga sa oras nga programa  dumalaon  sa giilang "King of Cebu Motocross" nga si Pepo Rubi ug MS Motosuit operations officer Ramil V. Ayuman. (BANAT NEWS)