Thunder nakarekober, Spurs nayayay

Gikan sa 0-2 nga biya, mibalik ang Oklahoma City Thunder.   Human sila modaog sud sa duha ka duwa, nagtabla na sa 2-2 series ang Thunder ug ang San Antonio Spurs  sa Western Conference Finals.

Ang Thunder mibawos sa Game-3  sa  iskor  nga 106-97 ug sa Game-4 kagahapon, 105-92 didto sa Chesapeake Energy Arena sa Oklahoma City.  Mobalik ang Game-5 didto sa homecourt sa Spurs diin kinahanglan na silang modaog  nianang higayona kay sa higayon nga madisgrasya sila didto, hamukon na sab sila niadtong 2012 West Finals diin nagmangtas ang Thunder.

May katarungan sa usa ka NBA team nga  pahimuslan gyud  ang  gitawag og "homecourt" advantage kay kana lang higayon nga duna sila'y ikasugakod ilabi na nga ang homecrowd maoy naghatag nila'g dugang espiritu ug kadasig. Dili na siya maghuwat og milagro sa ilang road game kay talagsaon ra gyud kana mahitabo nga kanang mga "road warriors" adto magsaulog sa laing korte kay walay mas tam-is nga selebrasyon kun  manuhot-suhot sa inyong dunggan ang hughaw sa mga fans ug maglumpayat diha sa inyong atubangan.

Hinuon, dili pa nato matag-an kun  kinsa gyud kanila ang moabante sa NBA Finals karong Hunyo. Ang segurado lang niini nga kun moabot man gani'g Game-7  adto mobalitok ang pabor sa Spurs.

Parehong nagdumot ang Spurs ug ang Thunder sa Miami Heat ug bisan asa tali kanilang duha gusto gyung mobawos.

Sa NBA Finals sa miaging tuig, pipila na lang unta ka segundos, mabawi na unta sa Western team ang titulo sa NBA sa Game-6,

apan ang "killer trey" ni Ray Allen maoy naghatod sa duwa sa overtime ug nakaipsot gyud ang Heat aron dad-on og balik ang Finals didto sa ilang homecourt. Tuod man, ang  Heat maoy nakampiyon human modaog sa Game-7.

Kun  mosulod ang Spurs, motugot pa kaha sila nga mausab ang maong hitabo?

Sa 2012 NBA Finals, namatikdan dayon nga hilaw pa kaayo ang Thunder sa usa ka championship game diin nagkinahanglan kana og mental preparations.  Dili lang kay ang pagpunay og itsa anang bola maoy imong buhaton sa finals ug dili lang kay pulos lang sab depensa. Kinahanglan parehong maayo ang templada sa opensa ug depensa.  Mao kadto ang usa sa hinungdan nga yanong gikuso-kuso sa Heat ang Thunder . Ang Heat  maoy miangkon sa kampiyonato sa Game-6.

Apan kun ang Thunder sab maoy moabante sa Finals, ila ba kahang tugotan pag-usab ang Heat nga molatos kanila sa tumang kasayon?

Kini maoy atong atangan!