Andam na ang tanan alang sa pagpahigayon sa 8th Mayor Adelino B. Sitoy Inter-Barangay basketball tournament nga gitakdang sugdan karong Mayo 31 didto sa Cordova Sports Complex.
Moabot sa 50 ka teams gikan sa nagkalain-laing age-bracket ang mosalmot sa maong torneyo.
Mao kini gibutyag ni Basketball Association of Cordova (BAC) commissioner Boy Allan Lataza nga kanhi USC Warriors ug kanhi team manager sa Skygo Motors sa Cebu Basketball Federation (CBF).
Aron mosamot sa kasadya, si Lataza mopasiugda sab og Inter-Collegiate ug Open basketball tournament diin naglaraw siyang moimbitar og labing menos unom ka teams. Gawas sa collegiate teams, mokuha sab sila og duha ka commercial teams.
Ang kampiyon sa Inter-Collegiate/Inter-Commercial makadawat og P50,000, ang second placer makaangkon og P30,000 ug ang third mobulsa'g P20,000.