Cebuano dance athletes misidlak didto sa Estados Unidos
CEBU, Philippines - Tulo ka Cebuano dance athletes ang mirampa ug mipakita sa ilang kaigmat aron modaog og daghang dungog sa duha ka managlahing kalihukan didto sa Estados Unidos.
Ang tandem nilang Hannah Deluvio ug Christopher Corro migawas nga kampiyon sa standard pre-championship amateur open sa Philadelphia Dancesport Championships.
Gawas pa niana, sila si Deluvio ug Corro midaog sab og bronze sa latin pre-championship amateur open sa mao gihapon nga kompetisyon.
Laing Sugbuana nga si Mae Lozada misadsad sab sa maong kalihukan uban ni Dennis Sy sa Dumaguete City ubos sa professional category apan pakyas pagdaog og medalya. Hinuon, sila si Lozada ug Sy nakabawi pinaagi sa Fred Astaire Cross Country Dance Championship didto sa Atlanta, Georgia niadtong weekend.
Sila si Lozada ug Sy mihakot sab og duha ka bronze medals pinaagi sa professional rhythm-closed division ug sa open professional latin.
Sila si Lozada, Deluvio ug Corro misadsad ubos sa landong sa DanceSports-Team Cebu City. (BANAT NEWS)
- Latest
