CEBU, Philippines - Human sa malampuson niyang kampanya didto sa Lion City, ang Sugbuanong seklista nga si Niño Surban mobalik na sab didto sa Singapore karong weekend aron mosalmot sa Tampines Mountainbike Cross-Country Race 1 didto sa Tampines trails.
Si Surban bag-o lang nidaog sa super challenge, usa ka 59 kilometro nga open race sa 2014 OCBC Cycle Singapore sa miaging semana.
Karong Marso 6, si Surban subli na sab nga mopakita sa iyang abilidad ubos sa men's elite division nga adunay unom ka laps diin matag lap adunay gilay-on nga 4.2 kilometros.
Ang pagsalmot ni Surban didto sa Singapore, kabahin sa iyang pagpangandam alang sa mas daku nga mga lumba sa mosunod nga duha ka bulan. Sunod buwan, si Surban mosalmot sab og duha ka mga dagkung kompetisyon didto sa Japan. Human sa lumba didto sa Yawatahama ug sa Fujimi Panorama, si Surban mopakita'g aksiyon sa pagsikad sa ASEAN Mountainbike Cup Series nga gikatakda sa Hunyo 13-15 didto sa Danao City. (BANAT NEWS)