E-ban silang Slaughter ug Lassiter? Kang kinsa man kuno nang order?

Dili pa lang dugay, misugyot kini si coach Joseller "Yeng" Guiao sa Rain or Shine Elasto Painters nga e-ban sa PBA silang Gregg Slaughter, ang rookie sa Barangay Ginebra ug si Marcio Lassiter, ang kugihan nga Fil-Am sa San Miguel Beermen.

Silang Slaughter ug Lassiter nagdumili sa imbitasyon sa RP Team Smart Gilas Pilipinas sa pagsalmot sa 17-man training pool alang sa 2014 FIBA World Cup karong Agosto didto sa Spain.

Matud pa nilang Slaughter ug Lassiter mas maayo gyud unta nga ang kadtong 12 ka sakop sa Gilas nga mipakauwaw sa South Korea, mao lang gihapo'y dad-on kay nakita sab tingali nila nga gawas nga angayan o "deserving" nakita sab nilang kung gi-unsa pagpaningkamot sa team aron makuha nato pag-usab ang luna sa World Cup nga talagsa-on ra gyud kaayong mahitabo sa kasaysayan sa atong basketball dinhi sa nasud.

Nakasabot na si Gilas head coach Chot Reyes sa pamahayag nilang Slaughter ug Lassiter. Nakasabot na si PBA Commissioner Chito Salud ug nakasabot na ang kadaghanan sa mga PBA players ilabi na kadtong mga bag-o ug nangindahay sab ganing mahimong sakop sa RP Team.

Nakasabot na sab si University of the Visayas (UV) president ug kanhi Cebu 1st district  congressman Eduardo R. Gullas o nailhan  natad sa politika sa bantugan ug iladong ngalan nga Eddiegul kinsa nakadayag sa prinsipyo ni Slaughter.

Usa na lang tingali maoy wala pa makasabot ug kini siya nagpadala lang tingali sa iyang sayop nga pagtuo o sobraan nga emosyon o pagbati tungod kay gusto niyang ipaun silang Slaughter ug Lassiter.

Dinhi na gyud tingali mosamot kadaghan og kotnra kini si coach Yeng Guiao. Ako kining higala si coach Yeng kay maayo kaayo kini managad og mga sakop sa media ug maayo siya mopahiluna sa mga Sugboanong players ilabi na kadtong musanong sa iyang gustong isugo.

Apan niini karong iyang sugyot nga e-ban silang Slaughter ug Lassiter, maka-ingon ako nga dili kana maayo ug sayop ang iyang sugyot kay daw sa wala niya respetohi ang desisyon sa uban. Usa ka public figure si Slaughter tungod kay usa siya ka PBA player apan dili tingali buot pasabot nga tanan niyang hukom mahimong uyonan sa publiko kay duna tingali siya'y katungod nga muhimo'g pribadong hukom.

Kung siya pa pananglit ang nagsul-ob sa sapatos ni Slaughter unya sawayon ang iyang kumentaryo, dili ba kaha sab siya malain o masakitan?

Bisan gani si Atty. Baldomero Estenzo, ang team manager sa University of Cebu Webmasters ug Dean sa College of Law nga naka-himo na'g topnotchers bisan sa hamubong panahon sa iyang pagdumala isip dean, nagkanayon sa iyang text message nga "dili ko uyon."

Ako sa akong bahin, ang pagbalibad nilang Slaughter ug Lassiter dili dautan. Mahimo tingaling gimandoan sila sa ilang mga coaches sa team (wala'y kamatuoran) aron paglikay sa injury, apan kung imong tu-ison ang ilang gisulti, lawom og mensahe apan tinuod.

Kung ako'y pasultihon, kung naa may e-ban sa PBA, si coach Yeng maoy angay tungod kay siya maoy naghatag og dili maayong hulagway sa lega nga iyang girepresentahan.

Aron masayud ang akong mga higala ug mga suki sa SPORTSgab nganong naka-ingon man ako nga siya maoy angayan e-ban, akong ipakita kaninyo ang iyang mga atraso sa, PBA ug kamo nay bahala motimbang-timbang kung nakahatag ba kinig nindot nga imahe o nakadaut ba.

Nakakita man tingali kamo sa Game 6 sa finals sa PBA Philippine Cup nga diriyot mo-walk out si coach Yeng batok sa San Mig Coffee Mixers.

Tungod niadtong iyang gibuhat, gimultahan siya'g dos milyones pesos. Buot pasabot kay dako siya'g sala, dako sab og multa. Silang Saughter ug Lassiter namulthana na ba og ingon ana kadak-a?

Dugang pa gyud niana, ania ang kasayasayan sa coaching career ni  Yeng Guiao, ang gitawag og "The Walk-Out Guy of  Philippine Basketball."

Nailhan si coach Yeng sa iyang istelo sa coaching nga pisikal nga gani nagduda ang kadaghanan nga iyang suguon ang iyang mga players nga mamigay aron lang gyud paghadlok sa kontra. Nabaldado si Eugene Tejada sa Purefoods batok sa Red Bull ang kanhi team ni coach Yeng niadtong Mayo 14,2006.

Sa mao gihapong tuiga, nagkalalis si Yeng ug kanhi Talk'N Text team manager Franki Lim kalabot sa pag-initay nilang Carlo Sharma sa Red Bull ug Asi Taulava. Human niana, gisuspenso si coach Yeng og usa ka duwa.

Atol sa Game 6 sa 2006-07 sa PBA Philippine Cup semifinals batok sa San Miguel Beer, na-ejected sab si Guiao sa second quarter human sa duha ka technical fouls, ang usa ka technical niini dihang iyang gituyo og siko si Dondon Hontiveros human makaigo og three-pointer.

Dihay usa ka higayon nga gisaway siya ni coach Tommy Manotoc dihang nagsangka ang Red Bull batok Smart Gilas dihang wala niya palingkora si Wynie Arboleda nga dili na duwa maoy tuyo apan ang pagpasakit na sa iyang kontra nga si JV Casio nga angayan untang buhaton sa usa ka responsableng coach. Nahitabo kini niadtong Oktubre 16, 2009.

Tungod niadtong hitaboa, gisuspenso sa tibuok season si Arboleda kinsa nakig-away ug fan nga si Alain Katigbak didto sa courtside.

Laing hitabo atol sa ilang sangka batok sa Petron Blaze sa 2013-2014 Philippine Cup dihang iyang gipalingkod si Beau Belga ug mi-walkout.Sa Game 5 sa finals batok sa San Mig Coffee, nagkanayon si coach Yeng nga walay luna sa iyang team ang mga pildero kay iya kining tangtangon ug sa Game 6, nahitabo ang walk-out apan mibalik ra sab sila wala madugay.