CEBU, Philippines - Naghinam-hinam na usab ang mga magduduwa'g ahedres dinhi sa Sugbu sa laing kulbahinam nga kumbati pinaagi sa 3rd Marcelo 'Loloy' Ruelan Memorial Open Chess Tournament karong weekend diha sa Deep Blue Chess Club sa second level sa SM City-Cebu.
Ang 7-round Swiss system competition nga gipaluyohan sab sa Cebu Executives and Professionals Chess Association(CEPCA) nagtanyag og P10,000 nga ganting salapi ngadto sa mga mananaog.
Ang kampiyon mobulsa og P5,000, mopahiluna sa ikaduhang dapit makadawat og P3,000 ug ang ikatulo makaangkon og P1,000, samtang ang mopuwesto sa ikaupat makadawat og P500.
Mopuwesto gikan sa ikalima hangtod sa ika-10 nga dapit gantihan og P300 matag usa.
Adunay kini registration fee nga P200.
Alang sa dugang pang mga pakisayod, mahimong mokontak ni FIDE Arbiter Marvin Ruelan sa 0926-7352951.
Ang duha ka adlaw nga torneyo gipaluyohan nilang Ethi Dominguito, Atty. Jose Mariano Tan, Dr. Darcy Tabotabo, Atty.
Gaudioso 'Jong2x' Melendez, Atty. Ben Harayo, ABC President Wilfredo M. Diamante, Andrew Aznar ug Cepcans Jun Olis ug Boy Pestaño. (BANAT PALARO)