CEBU, Philippines - Namunga ang mga paningkamot ni Roy Carbonera dihang miugkat siya og duha ka titulo sa 9th Camotes Island Cycling Challenge niadtong weekend didto sa San Francisco, Camotes.
Napuhalan ni Carbonera ang sakop sa Philippine Team nga si John Rene Mier sa junior-senior division sa road race event. Si Gino Basirgo nalandig sa ikatulong dapit.
Gipakita sab ni Carbonera ang iyang kasinatian sa cross-country aron maugkat ang ikaduhang titulo. Gisundan siya ni Warren Vinan, samtang ang igsuon ni Carbonera nga si Randy mi-okupar sa ikatulong dapit.
Sama ni Carbonera, sila si Ramon Espinosa ug Nilo Barbalose midaog sab og duha ka korona.
Giharian ni Espinosa ang veterans class, uban ni Barbalose nga naghari sa masters class.
Si Michael Tiongco maoy nanghawod sa executive division, samtang si Arjay Beato mipatigbabaw batok ni Delfin Delfin ug si Michael Mier naghari sa beginners category sa maong road race.