CEBU, Philippines - Mikabkab og mga medalya ang Cebuano jins dili lang sa paborito nilang poomsae event, apan apil na sab sa kyorugi o sparring competition sa Carlos Palanca Jr. Taekwondo Championships sa miaging adlaw didto sa Ninoy Aquino Stadium sa kaulohan.
Giharos og larot sa mga Sugbuanon ang tanang bulawan sa cadet class (12-14 year old) ug ingon man sa juniors division (15-17 years old).
Si Maegan Bugarin sa University of San Carlos mikubkub og bulawan sa women's junior division, samtang ang iyang teammate nga si Nichole Maruin mitiltil og bronze. Naka-gold sab si MacAvyngyr Alob sa Sacred Heart School-Ateneo de Cebu sa men's division.
Sa laing bahin, sila si Aida Laxa ug Clement Tan maoy nidominar sa tagsa-tagsa ka dibisyon sa cadet action.
Ang playing coach nga si Glenn Lava midaog og silver sa seniors 2 class.
Daghan sab og nadaog nga bronze medals ang pambato sa Sugbu kortesiya nilang Matthew Bugarin, Cheyena dela Fuente, Kobe Hyarana ug Robiegayle Navales.
Sa sparring event, ang koponan sa Sugbu midaog og usa ka gold, duha ka silver ug tulo ka bronze medals.
Si Veronica Garces maoy mitunol sa bugtong bulawan alang sa Sugbu pinaagi sa finweight class. Ang silvers gitunol nilang Sharmaine Abaracin sa category 2 ug Wndil Jay Ram sa category 3, samtang ang mga bronze naggikan nilang Carmela Coran, Melody Jane Infante ug James Louie Calino.