San Mig mosuway pag-abante sa semifinals

CEBU, Philippines -  Suwayan sa San Mig Coffee Mixers pag-abante sa semifinals sa dihang ilang harungon ang defending champion Talk N' Text Tropang Texters sa Game-2 sa ilang "best-of-three" quarterfinals series sa PBA Philippine Cup karong adlawa didto sa SM Mall of Asia Arena.

 Giangkon sa San Mig ang Game-1 niadtong Martes sa iskor nga 90-83 ug nagkinahanglan na lang sila og usa ka daog aron  masulod sa Final Four.

 Ang San Mig-Talk N' Text showdown sugdan sa alas-5:45 sa hapon. Isunod sab dayon ang laing quarterfinals series tali sa Petron Blaze Boosters ug Barako Bull Energy Cola sa alas-8 sa gabii.

 Ang San Mig misulod sa playoffs uban ang 7-7 win-loss record sa elimination ug maisip nga dakung kadaugan alang kanila kun matagak nila ang fourth seed nga Talk ‘N Text (8-6).

 Aron ilang ma-sweep, si coach Tim Cone nagpaabot og laing impresibong duwa gikan nila ni James Yap, Peter Jun Simon ug Smart Gilas cager Marc Pingris.

 Sa ilang bahin, ang Texters nga tinguhang motabla sa series, magsalig nila ni Danny Seigle, Jimmy Alapag, Jayson Castro ug bag-o nilang recruit nga si KG Canaleta.  (BANAT PALARO)