CEBU, Philippines - Pormal nga mosikad ang 4th Sinulog Football Festival karong adlawa sa duha ka managlahing binyu sa Aboitiz Sports Field ug sa San Roque Parish field nga pulos nahimutang sa Brgy. Subangdaku sa dakbayan sa Mandaue.
Adunay kinatibuk-ang 168 ka koponan ang kompirmadong mopakita'g aksiyon sa tinuig nga kompetisyon.
Ang mga duwa karon sa Aboitiz Sports Field naglakip sa mixed under 7, 9 ug 11 categories uban sa girls 15 ug 18.
Samtang didto sa San Roque Parish fields, duwaon ang boys under-18, 15 ug 13 divisions.
Sa Domingo, ang Aboitiz Sports Field mo-host sa men’s open diin adunay 25 ka teams ang misalmot, gisundan sa under-18 nga adunay 24 ug 38-above nga may 12 ka koponan.
Ang San Roque Parish field maoy binyu alang sa Inter-BPO, Inter-Company, ladies open ug sa 38 and above category.
Ang mga winners sa tagsa-tagsa ka age groups ug tournament categories makadawat og tropeyo alang sa teams ug medalya alang sa players.
Lain pang mga kategoriya nga tigian mao ang U18 boys nga adunay 24 ka teams, U15 boys ug U13 boys nga adunay tag-20 ka koponan ug ang U11 mixed nga adunay 15 ka teams.
Gipasalamatan sa organizing Cebu Football Association (CFA) ang Super Metro sa ilang pagpaluyo sa duha ka adlaw nga torneyo, ilabi na nga ang Sinulog Foundation nga wala mohatag og pinansiyal nga suporta ning higayona.
Mosuporta sab sa maong torneyo mao ang Aboitiz Land, Aboitiz Sports Field, Noise Garaga ug Dakay Construction and Development Corporation.