CEBU, Philippines - Masaligon si one-time world title challenger Milan 'El Metodico' Melindo (30-1,12KOs) nga daku ang mahimong kalamboan sa iyang abilidad ug kusog human unya sa iyang training camp didto sa Estados Unidos.
Si Melindo uban sa iyang ALA Gym stablemate nga si Genesis Servania nagsugod na sa ilang training camp didto sa US diin nagpasingot na sila didto sa House of Boxing Training Center sa San Diego, California.
Uban ni ALA chief trainer Edito Villamor, ang duha ka boksidor motikang usab sa Wild Card Gym ni Hall of Famer Freddie Roach ug boxing gym nga gipanag-iya ni Mexican legend Erik 'El Terrible' Morales.
Si Melindo, 25-anyos, nagkanayon nga daku'g matabang ang pag-ensayo didto sa US sa pagtaas sa iyang kompiyansa alang sa mga umaabot pa niyang mga sangka.
Kursonada si Melindo pagbangon sa iyang ngan isip usa ka top contender sa 112 lbs. division human sa pait niyang kapildihan ngadto ni WBA/WBO flyweight champion Juan Francisco Estrada pinaagi sa "unanimous decision niadtong Hulyo 2012 didto sa Macau.
"Training here (US) is very important for me not only to enhance my skills but also to improve my confidence level," matud pa ni Melindo. "I don't know how many times I will fight this year, but I will try to show in each fight how I improved after my training camp here in the US."
Sa katapusan niyang saka sa ring, si Melindo midaog pinaagi sa "unanimous decision" batok ni Mexican Jose Alfredo Rodriguez aron mailog ang WBO International flyweight title niadtong Nobiyembre sa Smart Araneta Coliseum sa miaging tuig. (BANAT NEWS)