CEBU, Philippines - Pakyas man sila pag-abante sa finals, apan daling mibangon ang University of the Visayas (UV) Green Lancers dihang ilang gipanitan ang University of Sto. Tomas (UST) Growling Tigers, 100-88 aron mopuwesto sa ikatulo sa pagtapos sa UniGames kagahapon didto sa Bacolod City.
Matud pa ni coach Felix 'Donbel' Belano, mas lahi ang matang sa duwa nga gipakita sa UV batok sa UST kagahapon itandi sa Ateneo dihang napilde sila sa iskor nga 54-76.
"We played with pride as champions," matud pa ni Belano kansang tumong karon mao ang pagpakita og maayong labok sa Philippine Collegiate Champions League (PCCL) nga gikatakdang sugdan karong Nobiyembre 9.
Nabalikan sa espiritu silang John Abad ug Wowie Escocio dihang mihapos kini 'g 23 ug 20 puntos matag usa alang sa 13th Cebu Schools Athletic Foundation Inc. (CESAFI) champion UV Lancers.
Apan ang 14 puntos ni Arvie Cabañero maoy labing importante tungod kay mihimo siya'g sagunsong otso puntos sa third period diin didto nainat pag-ayo sa UV Lancers ang ilang labaw dihang mihulga pagsikit ang UST.
Si Rhaffy Octobre miamot og 11 puntos alang sa UV Lancers.