CEBU, Philippines - Padayong nanghawod si Meiriz Ramirez sa natad sa dagan human midaog sa 21K women's open division sa Parkmall's "The Green Mile: Running the Distance for Kids with Cancer" niadtong Domingo didto sa dakung hawan sa maong mall.
Human niya gidominar ang UCCP-Bradford's Centennial Run niadtong Sabado, si Ramirez midaog sa iyang ikaduhang sunod-sunod nga half-marathon race dihang gitapos niya ang lumba sud sa usa ka oras, 42 minutos ug 51 segundos.
Nagsunod alang sa ikaduhang dapit si Mary Jane Beboso nga mi-oras og 1:51.16, samtang ang veteran Cebuana runner nga si Christy Sevilleno-Tutor nalandig sa ikatulo sa oras nga 1:54.34.
Sa men's 21K division, si Raphael Piscos mipuhal sa panon sa mga tang-ang runners aron modaog sa titulo. Gitapos niya ang lumba sud sa usa ka oras, 15 minutos ug 11 segundos. Sila si Bonifacio Monjas (1:17.24) ug Noel Tillor (1:18.05) mi-okupar sa ikaduha ug ikatulo nga dapit.
Liboan ka runners ang midagan sa fund-raising event diin ang proceeds niini adto mapunta sa The Freeman Foundation ug alang usab sa pagpaayo sa kampanaryo sa Basilica del Sto. Niño nga nagusbat sa kusog nga linog niadtong Oktubre 15.
Ang The Freeman Foundation nakaserbisyo na ngadto sa mga Sugbuanon sud na sa 25 ka tuig pinaagi sa nagkalain-laing medical missions, back-to-school ug feeding programs sa mga kabarangayan sa probinsya. Ning bag-o, nagpahigayon usab sila og relief campaigns alang sa mga biktima sa linog didto sa Bohol.
Sila si Lovely Fe (58:10) ug Jhean Andrin (59.19) mipahiluna sa una ug ikaduha nga dapit sa women's 12K, samtang si Sarah Lee Cuizon (1:07.03) napunta sa ikatulo. Si Ronnie Andrin (43.46) maoy naghari sa men's 12K division. Si Michael Largo (43:49) miangkon sa ikaduha, samtang si Robert Daang (43:55) nalandig sa ikatulo.
Sila si Cherry Andrin (25:42) ug John Daryl Manos (20:04) maoy nanghawod sa ilang tagsa-tagsa ka dibisyon sa 6K open, samtang sila si Jolan Omilla (10:17) ug Irish Delechos (12:58) maoy kampiyon sa 3K open.
Si Kevin Cortes uban sa iyang iro nga si Yuko (21:15) ug Rosalle Bidao uban sab sa iyang iro nga si Chloe (22:59) maoy kampiyon sa 1K "run with your dog" category.