Bakus ni Pacquiao target ni Marquez
Karong adlawa mag-abot na ang mga "nemesis" sa atong Pambansang Kamao nga sila si Juan Manuel Marquez ug Timothy Bradley didto sa Las Vegas, Nevada.
Apan sa dili pa kita maghisgot nila ni Bradley ug Marquez, molabyog una ta sa preparasyon ni Manny 'Pacman' Pacquiao alang sa sangka niini batok kang Brandon 'Bambam' Rios karong Nobiyembre 24 didto sa Macau. Si Rios sumala pa sa mga balita, hanoy na kaayo ang preparasyon ug ensayo. Naa kaniya ang coach ni Nonito Donaire Jr. nga si Robert Garcia ug ang gitaktak sa kampo ni Pacquiao nga si conditioning coach Alex Ariza aron palig-unon pa ang lawas ni Rios. Wala usab sila'y problema sa mga maka-sparring ni Rios nga susama'g estilo ni Pacquiao tungod sa kadaghan sa mga Mexican boxers ug uban pang mitabang sa ilang preparasyon.
Apan ang kampo ni Pacquiao, gawas sa iyang kaugalingong pag-ensayo didto sa General Santos ilawom sa pagdumala ni Buboy Fernandez ug sa bag-ohay lang miabot nga trainer nga si Freddie Roach wala na gyud unta'y problema, gawas lang sa kakulang sa maka-spar ni Pacman nga susama og estilo ni Bambam, sumala pa sa mga balita. Kinahanglan gyud ni Pacquiao nga modaog sa iyang sangka kang Bambam. Dili lang basta daog, kun dili impresibong knockout gyud kun gusto niyang mabalik pa ang pagsalig sa boxing fans. Kay dili niya kini ma-KO hilaw ang kadaugan, ug mas pait kun mapildi pa gyud.
* * *
Sila si Bradley ug Marquez pulos gustong mokulit og legasiya sa boksing. Si Bradley gusto nga pamatud-an nga dili tsamba ang iyang duha ka mga kadaugan gikan sa kontrobersyal nga sangka nila ni Pacquiao ug Ruslan Prvodnikov. Tungod kay hangtod karong mga panahona, mismong si Bradley gikuwangan sa pagdawat kaniya sa boxing fans, duna gihapoy mga mikuwestiyon sa iyang abilidad.
Wala gyud hinuon kaayo ko'y bilib kang Bradley. Una, wala siya'y knocking power sama nila ni Pacquiao, Marquez ug Floyd Mayweather Jr. ug sa uban pang boksidor sa welterweight division.
Kun ugaling modaog si Bradley, posibleng sa "unanimous" o "split decision" ra nga paagi kana kun dili siya ma-KO ni Marquez nga sa akong tan-aw maoy mahitabo niya sa dili pa moabot ang ikaunom nga round. Ang dag-anan lang ni Bradley mao ang "hit and run" tungod kay si Marquez maoy usa sa labing maayong counter-puncher. Buot ni Marquez nga sementuhon ang iyang pangalan isip labing maayong boksidor sa kalibotan. Iya nang gikasangka ang mga dekalibreng boksidor sama ni Pacquiao ug Mayweather Jr. Sa akong tan-aw napugos lang si Marquez sa pakigsangka ni Bradley aron makuha ang bakus ni Pacquiao nga dugay na kaayo niyang gipangandoy human siya mapakyas sa makatulo ka higayon. Karon suwayan kini niya pagkuha kang Bradley.
Sa duha, mas pilion nakong modaog si Bradley, tungod kay wala may problema kaniya kun makigsangka siya og balik kang Pacquiao.
Apan kun si Marquez, kuli na kaayong paatubangon pag-usab kang Pacquiao tungod kay na-enjoy na niya ang bunga sa pag-knockout sa Pacman.
Bisan pa man og himuong mandatory nga sila abuton sa ikalimang higayon, mahimo ra siyang moretiro ug bakantihon ang iyang bakus.
Bahala na lang og dunay moingon nga "nanalaw" na siya. Kay sa katapusan nilang panag-abot gipakatulog man niya si Pacquiao.
* * *
PAGTULON-AN: Mas maayong maminaw nungka magtagawtaw nga walay direksiyon. Kay inay makatabang makadaut na hinuon.
- Latest
