CEBU, Philippines - Gilubong sa team Joemangs ang CESAFI fourth placer University of San Jose- Recoletos (USJ-R) Jaguars, 83-66 sa ilang "exhibition game" niadtong Sabado sa gabii didto sa Tubod, Toledo City.
Ang Joemangs ni playing coach Mike Sereño nga aduna lamang siyam ka players miarangkada dayon pagsugod aron moposte og 19-7 nga bentaha sa first period. Mitubo pa ang labaw ngadto sa 45-24 sa halftime.
Ang Joemangs nga gipanag-iya ni Lito Manguerra, gipangulohan sa USPF Panther power forward nga si Art Camello, kinsa miposa'g 16 puntos, samtang upat niya ka teammates ang mihimo'g double figures. Si Rafael Reyes miiskor og 15 puntos, si Michael Cadiz miamot og 12 puntos, samtang silang Jomari Sollano ug Carl Valencia mitampo'g 11 puntos matag usa.
Bugtong ang rookie forward nga si Fletcher Galvez ang nakahimo'g double figures alang sa Jaguars human siya moburak og 18 puntos, lakip na niini ang upat ka three-pointers. Ang Joemangs, kinsa napilde sa mas lig-on nga CESAFI champions UV Green Lancers sa bag-o lang gisugdan nga Aloguinsan Mayor’s Cup niadtong Domingo, nagtinguha nga makarekober dihang ilang ikasangka ang AC Sports karong Biyernes.
Gawas sa Aloguinsan Mayor's Cup, ang Joemangs misalmot sab sa nagpadayong Kimwa basketball tournament ug sa Lapu-Lapu Mayor's Cup. Laraw usab nila nga mosalmot sa nagsingabot nga Carcar Mayor's Cup.
PUNTOS MATAG USA
Joemangs (83) - Camello 16, Reyes 15, Cadiz 12, Sollano 11, Valencia 11, Paspe 9, Avila 7, Manguerra 2
USJ-R (66) - Galvez 18, R. Senining 8, Olbedado 8, Regalado 7, Sulay 7, Lajato 6, Villarosa 5, Ladbon 4, Re. Senining 2