CEBU, Philippines - Gipilde sa Don Bosco Technology Center (DBTC) booters ang karibal nilang Sacred Heart School-Ateneo de Cebu (SHS-AdC) pinaagi sa penalty shootout, 4-2 aron makuha pagbalik ang korona sa secondary football event sa 13th Cebu Schools Athletic Foundation Inc. (CESAFI) sa miaging gabii didto sa Cebu City Sports Center (CCSC) football field.
Patas ang gipakitang duwa sa duha ka kampo hinungdan nga wala gyu'y bisa'g usa kanila ang nakaiskor sa first half.
Didto na nabuak ang kabugnaw sa duwa dihang si Glenn Thomas Ramos miiskor sa 45th alang sa DBTC. Hinuon, ang SHS-AdC mibawos pinaagi ni Jun Canlas, kinsa naka-goal sa 77th aron tablahon ang iskor hinungdan sa overtime.
Sa dugang oras, ang SHS-AdC maoy unang nakapasud kortesiya ni Kintaro Miagi, apan si Ezra Decena sa DBTC mipatabla sa duwa, 2-all hinungdan sa penalty shootout.
Sa shootout, ang DBTC mipakita og dakung determinasyon pagpukan sa SHS-AdC, 4-2 luyo sa mga paningkamot nilang Decena, Aenry Balobo, Andrei Roa ug Moisel Alforque.
Sila si Miguel Kwan ug Kyle Silawan mao lang ang naka-iskor alang sa SHS-AdC.
Mao kini ang ika-11 CESAFI title sa DBTC ug ang kadaugan usa usab ka tam-is nga panimalos sa SHS-AdC, kinsa mipalagpot kanila sa miaging tuig pinaagi sa 4-1.
Sa sayo pa, ang University of Southern Philippines Foundation (USPF) miiskor og 4-0 nga kadaugan batok sa University of San Jose-Recoletos (USJ-R) aron masakmit ang third place trophy.