CEBU, Philippines - Sa pangedaron nga 24-anyos, si Mary Joy Tabal matawag na nga beterana sa natad sa dagan, apan ang Sugbuanang running
sensation nangandoy nga makahatag og dungog sa nasud sa international event.
Si Tabal giila gihapon nga reyna sa 21-kilometer run atol sa 37th National Milo Marathon Visayas leg takdo nang usa ka
semana ang nilabay niadtong Septiyembre 22 didto sa Cebu City Sports Center diin iyang gitapos ang maong gilay-on sa lumba sud sa
usa ka oras, 24 minutos ug 50 segundos.
Kini ang ikatulong Milo regional leg title nga nadaog ni Tabal human sa iyang sunod-sunod nga kadaugan niadtong tuig 2010
ug 2011.
Si Tabal, kinsa bag-o lang usab nakahuman sa kursong Masters in Public Administration sa Southwestern University (SWU)
mikompisal nga human sa Cebu leg sa National Milo Marathon, damgo niya nga makabaton na og titulo sa National finals karong
Disyembre didto sa kaulohan.
"Hopefully makuha na gyud nako. After sa Cebu leg padayon akong training uban sa akong coach nga si Phillip (Duenas), kinsa
mao sab ang midaog sa 21K men’s category," sumala pa ni Tabal.
Gawas sa ganti ug dungog, si Tabal nangahas usab nga makaangkon og pasaporte aron makadagan sa 2014 Paris Marathon,
ang usa sa labing dakung international marathon sa tibuok kalibotan.
"Nakadagan na ko og mga marathon gawas sa nasud pero feel nako lahi ra gyud nga maka-compete didto (Paris) kay makadagan
nako kuyog ang mga elite runners dili lang sa Asia apan lakip sa tibuok kalibotan.â€
"Kun makaapil ko didto sa Paris makahatag ko og pride dili lang sa Cebu apil na sa atong country," nagkanayon si Tabal.
Si Milo Sports Executive Andrew Neri mihatag sa iyang pagsalig ni Tabal nga maoy sunod nga mahimong national champion
tungod usab sa gipakitang kapaspas niini sa Cebu leg sa National Milo Marathon, usa sa labing daku ug labing karaan nga marathon sa
nasud.
"Joy Tabal really has a good chance to be the national champion," segun pa ni Neri.
Agi'g pangandam sa Milo National, si Tabal gikatakdang modagan og duha ka dagkung international race didto sa Malaysia sa
Oktubre ug Singapore sa Nobiyembre.
Gipahibalo ni Tabal nga laraw niya ug sa iyang coach nga si Duenas nga motukod og usa ka running school dinhi sa Sugbu diin
premyo nga ilang matigom gikan sa mga lumba nga ilang giapilan maoy gamiton nila nga puhonan.
"Dugay na gyud namo gusto nga gamiton among passion sa running sa business. Ganahan sab mi motabang sa mga gusto
mag-start og running ilabi na karon nga kusog kaayo ang running dinhi sa Cebu," panapos ni Tabal. (BANAT NEWS)