CESAFI referees maoy angayan basolon, pag-ban ni Junthy dili maoy solusyon

Niadtong Miyerkules, Septiyembre 18, nakadawat ako'g kopya sa suwat gikan sa USC Green and Gold Warriors Alumni Association nga gipirmahan sa ilang presidente nga si Nilo Velasquez. Duna sa'y pirma si Bogo City Mayor Celestino E. Martinez, Jr. kinsa maoy chairman sa Board of Directors ug auditor sa maong grupo.

Ang treasurer way lain kun dili ang coach mismo sa USC Warriors nga si Julian Macoy ug ang secretary mao si Raul Reyes.

Ang maong suwat ilang gi-address ngadto kang Cebu Schools Athletic Foundation, Inc. (CESAFI) commissioner Felix O. Tiukinhoy, Jr. ug dunay duha ka bug-at nga isyu nga ilang gustong adunay kausaban gawas pa sa tinguha nga kini duna sa'y kasulbaran aron paglikay sa dugang mga kontrobersiya nga hayan motumaw sa maong liga.

  Ang unang gitumbok mao ang pag-ban sa ilang assistant coach nga si Junthy Valenzuela kinsa kanhi player sa Reb Bull sa PBA ug ang ikaduhang gitumbok mao ang mga kasaypanan sa referees niadtong ilang duwa batok sa University of Cebu (UC) Webmasters sa quarterfinal round kaniadtong Septiyembre 6 didto sa USJR-Basak Campus gym diin midaug ang Warriors, 79-69 diin may nahitabong gamay nga kagubot dihang gibunal ni Valenzuela ang "monoblock" chair kon plastic nga lingkoranan didto dapit sa midcourt ug maayong pagkapusgay sa duha ka tiil niini.

Ang tan-aw sa mga pro-USC fans niadto ilabi na ni coach Macoy nga walay lain mabasol niadtong duwaa kun dili ang mga referees tungod sa ilang kapakyas pagkontrolar sa medyo nagka-grabeng pisikal nga duwa sa ilawom niadtong tungora tungod sa tinguha sa matag team nga modaug. Kung sayo pa lang unta gipang-technical ang mga players o gipang-warningan daan, dili unta moabot niadtong estadoha nga ma-ban si Valenzuela kinsa napikal na'g maayo dihang iyang nakita nga gituyo pagbangi ni Kenneth Niones sa UC si Victor Rabat sa USC samtang mopadung na og lay-up. Tuod man, na thrown-up si Niones apan ang mas sakit dawaton, sa sayop ni Niones ug sa mga refereees, mas bug-at ang naangkon nga silot ni Valenzuela kinsa gi-ban sa nahibiling duwa sa nagpadayong 13th CESAFI season.

Dihang dunay kagubot didto sa PBA dihang gituok sa Petron import nga si Relando Balkman ang iyang teammate nga si Arwind Santos ug niining bag-o lang dihang nagsukmagay silang Marc Pingris sa San Mig Coffee ug si Kelly Nabong sa Global Port apan sa wala pa sila pormal nga gipamtangan sa silot, gipatawag silang tanan ni Commissioner Chito Salud. Lahi ang nahitabo kang Junthy kay automatic ang desisyon lupig pa'y "kangaroo court"

Walay laing gibasol sa USC alumni kun dili ang pagka-walay igong ngipon sa mga referees pagtawag og technical. Sila na unya'y bahala total wala pa man mahitabo nga ang tanang sakop sa team nahurot og ka-technical tungod sa "unneccesary  roughness" gawas lang og silang tanan mosulod sa korte kung adunay "melee" o simukmagay nga gitawag sab og "basketbrawl."

Ang kining lagda sa CESAFI usahay dunay inamigo apan kanunay estrikto. Didto sa USJR gym nahitabo nga giwitkan ni Baby Warrior Ian Orocio dela Cruz sa iyang simud si Jonher Espina sa CIT-U tungod kay sobra ka sikit kung modepensa kaniya. Na-thrown si Dela Cruz ug automatic may one-game suspension ug may multa nga singko mil pesos. Wala kini kalainan kang Valenzuela apan mas grabe ang iyang silot kay ban gyud. Kung mas dako ang iyang sala, mas dako sab unta og multa? Kini maoy lisud sabton.

Aron dunay hustisya kang Valenzuela, maoy gusto ni Mayor Junnie nga suspensohon sab ang mga referees nga maoy nag-officiate niadtong duwa tali sa USC batok UC. Unsa man diay ning mga referee sa CESAFI dunay "immunity from suit?" lupig pa nila'y mga senador ug kongresista.

Dihang nakighinabi ako ni Mayor Junnie, tataw sa iyang gipamulong nga wala siya malipay sa nahitabo sa Warriors ilabi na ang pag-ban ni Junthy. Mailhan sa iyang tingog ang grabeng kahimangud ug nakapangutana siya kung kanus-a man kini makakita'g solusyon?

Matod pa ni Mayor Junnie nga klaro kaayo nga sa matag duwa, ma-basketball man o laing sports, dako gyud og papel ang mga referees busa anaa ra gyud sa ilang mga "whistle" ang katunhayan sa liga. Walay gamit ang seminar halos matag tuig ug karon sa ika-13 nga tuig sa CESAFI, medyo nawad-an og interest pagtan-aw sa duwa ang ubang fans tungod sa mga bati ug dili kaayo patas nga tawag.

Sumala pa ni Mayor Junnie, nagtuo sab ang Warriors nga walay laing paagi nga modaug kung dili ang pagbawos sab pagpisikal sa ilang kontra hangtod nga magka-initay na hinoon ug angay kini tutokan og maayo aron malikayan sa umaabot pang mga katuigan.

Sa panapos sa ilang suwat, nagkanayon si Mayor Junnie nga igo lang silang mipahungaw sa ilang gitabi isip higala kay kung wala pa sila makig-communicate pinaagi sa suwat, dili diay sila tinuod nga higala.