CEBU, Philippines - Usa na lang ka daog, mobalik na sa finals ang defending champions Cebu Landmasters human napilde ang mas
paboritong Goldberry Suites, 83-76 sa Game-1 sa ilang "best-of-three" semifinal series sa 2013 Sacred Heart Ateneo
Alumni Basketball Athletic Association (SHAABAA) Mivesa Cup niadtong Domingo didto sa Sacred Heart School-
Ateneo de Cebu basketball courts sa Brgy. Canduman, dakbayan sa Mandaue.
Midaog sab ang Insular Square batok sa RDAK Transporters, 74-61 ug usa na lang sab ka daog ang ilang
kinahanglan aron moabante sa finals.
Ang idlas nga pointguard nga si Ed Macasling mipalig-on og samot sa iyang MVP bid human siya mobahog og
24 puntos, unom ka steals ug tulo ka rebounds.
Wala say nakapiog sa mga bigmen sa Insular Square nga naghatag og bentaha kang Antonio Datan aron
mohipos og 15 puntos.
Apan ang nakaangkon sa maayong adlaw mao ang Landmasters, kinsa nakarekober sa ilang ngil-ad nga
pagsugod sa torneyo ug karon nagtutok na balik ngadto sa finals.
Ang Landmasters ni team owner Joe Soberano mihimo’g mainitong rally sa second half aron mapukan ang
Goldberry nga maoy ilang kontra sa finals sa miaging tuig.
Sa makausa pa, nagmangtas na sab si Franco Te aron pangulohan ang Cebu Landmasters nga miburak og 26
puntos, samtang ang Goldberry gipangulohan ni Justin Huang sa iyang 20 puntos, gisundan nilang Dave Lim ug Dave Ting
nga adunay 16 puntos matag usa. (BANAT NEWS)