MANILA, Philippines - Bitbit ang ilang "twice-to-beat" advantage, ang University of the Visayas (UV) Baby Lancers miabante dayon ngadto sa semifinals human nila gitagak ang University of Cebu (UC) Junior Webmasters, 78-75 sa pagsugod sa quarterfinal round sa nagpadayong 13th Cebu Schools Athletic Foundation Inc. (CESAFI) basketball event kagahapon didto sa USJR-Basak campus gym.
Nag-agi una'g kulba ang UV Baby Lancers, kinsa milabaw og 17 puntos sa iskor nga 48-31 sa sayong bahin sa third period, apan kalit lang nagmangtas si Justin Dacalos nga mirakrak og 16 puntos sa maong kuwarter aron pangulohan ang mainitong rally sa UC Junior Webmasters. Ila pa gani na-outscore ang UV Baby Lancers, 25-22 sa kinatibuk-ang third period.
Nailog sa Junior Webmasters ang labaw, 72-71 sa nahabiling 3:19 sa final period human sa undergoal stab ni Mark Kevin Tan, apan wala madugay, gitabla kini ni JC Escalona pinaagi sa iyang split charities, 72-all.
Human sa sipyat sa UC, dakung three-point basket ang gibuhian ni Escalona sa katapusang dos segundos sa ilang shotclock nga maoy naghatag kanila’g 75-72 nga bentaha. Didto nabalikan sa kalagsik ang UV ug hingpit nilang gipalagpot ang UC.
Ning pagsuwat, padayon pa ang duwa sa third seed University of San Carlos (USC) Baby Warriors batok sa sixth seed Cebu Institute of Technology-University (CIT-U) Wildkittens.
Ang Baby Warriors maoy nagbaton og "twice-to-beat" advantage.
Si Escalona maoy nangu sa Baby Lancers sa iyang 18 puntos samtang si Jun Kent Manzo miamot og 13 puntos ug John Russell Diaz mitampo'g 11 puntos.
Sa laing bahin, si Dacalos mikabkab og 29 puntos aron pangulohan ang UC, gisundan nilang Daryl Shane Menina ug Ramil Tumulak nga adunay 16 puntos matag usa.
Puntos matag usa
UV (78) - Escalona 18, Manzo 13, Diaz 11, Limitares 9, Canete 9, Flores 9, Wamar 6, Ugsang 2, Silorio 1
UC (75) - Dacalos 29, Menina 16, Tumulak 16, Tan 4, Codilla 4, Isla 3, Nemil 3 (BANAT NEWS)