CEBU, Philippines - Ang University of San Carlos-BED mikulit og kasaysayan human sila maoy labing unang tunghaan nga midominar sa elementary ug secondary division sa 18th Milo Little Olympic-Visayas nga natapos kagahapon didto sa Cebu City Sports Center.
Gawas sa pagdepensa sa ilang titulo sa elementary level, gipaluhod usab sa USC ang power-house nga University of Cebu (UC) sa secondary division. Giputol sa USC ang dul-an 20 ka tuig nga paghari sa UC sa secondary level sa maong torneyo.
Ang USC mirehistro og 220 points gikan sa 13 sporting events, samtang ang UC nahimutang sa ikaduha sa ilang 175.8 points ug ang Abellana National School maoy third placer sa ilang 74.25 points.
Kun sikit ang puntos sa secondary level, naglawig ang USC sa elementary division sa ilang 238.5 points batok sa University of the Visayas (UV) nga adunay 62.5 points ug ang Sacred Heart School-Ateneo de Cebu mitugpa sa ikatulong dapit sa ilang 55 points.
“This is such a blessing.Wa mi-ga-expect ani although we ready did prepared for two to three years for this.This is a result of our long-term planning,†matud pa ni USC’s athletic coordinator Saturnino Mayorita sa The Freeman.
Sa laing bahin, ang tanang mga atleta nga nahimong gold medalist mag-uban sa usa ka koponan alang sa Team Bisdak nga morepresentar sa Region 7 alang sa mas dakung kompetisyon nga mao ang Milo National finals nga mahitabo sa Oktubre 24 ngadto sa 27 dinhi gihapon sa Sugbo. (BANAT NEWS)