CEBU, Philippines - Harungon ni ALA Boxing Gym prospect Melvin Gumban (14-0, 6KOs) si Indonesian fighter John Bajawa (11-4, 6KOs) sa "IDOL 1" fight card karong Agosto 24 didto sa Big Square sa Escalante City, Negros Occidental.
Ang Gumban-Bajawa showdown maoy supporting main event sa sangka tali sa laing undefeated ALA fighter nga si Mark Bernaldez ug Indonesian Marangin Marbun.
Ang 23-anyos nga si Gumban usa sa mga gilauman nga mahimong title contender gikan sa ALA Boxing Gym.
Sa katapusan niyang sangka niadtong Mayo 4, si Gumban mipakita sa iyang abilidad diin midaog siya pinaagi sa "unanimous decision" batok ni Fernando Ocon didto sa Mandaue City Plaza Square.
Turno na sab ni Gumban ipakita pag-usab ang iyang potensiyal sa iyang pakigsangka sa labing una niyang langyaw nga kaatbang nga si Bajawa.
Mokompleto sa fight card mao sila si John Rey Melligen batok Mark Magsayo, Alvin Sibugan batok Kim Galon, Geo Santisima batok Roniel Parcon, Richard Barrios batok Ryan Canillas ug Jerome Baja batok Kazuma Ejiri.