CEBU, Philippines - Mikulit sa ilang ikalimang daog ang Goldberry Suites human makaipsot batok sa Insular Square, 57-54 aron pabiling magsolo sa liderato sa Sacred Heart Ateneo Alumni Basketball Athletic Association (SHAABAA) Mivesa Cup sa miaging weekend didto sa Magis Eagles Arena sa Sacred Heart School-Ateneo de Cebu campus sa barangay Canduman sa dakbayan sa Mandaue.
Si Justin Huang mihimo’g double-double sa iyang 16 puntos ug 11 ka rebounds uban sa iyang tulo ka assists aron pangulohan ang Goldberry Suites, ang unang team nga nakapilde sa Insular Square sa lima ka duwa.
Ang guwardiya nga si Dave Ting miamot og 10 puntos uban sa iyang lima ka rebounds, unom ka assists ug tulo ka steals alang sa maong kadaugan.
Ang Insular Square gipangulohan ni Ed Macasling nga mibahog og 15 puntos, pito ka rebounds, unom ka assists ug lima ka steals.
Sa laing duwa, ang Gaisano Capital midispatsar sa RDAK Transporters, 50-47 aron makamugna og three- way tie alang sa ikaduhang puwesto.
Si Reggie Abbu maoy nangu sa Gaisano Capital sa iyang 17 puntos kadaghanan niini nakuha sa nanghinapos na nga bahin sa duwa.
Ang Gaisano, RDAK ug Insular nagtabla karon sa ikaduhang puwesto sa managsamang 4-1 win-loss records.
Sa lain pang aksiyon, ang Milco Fresh Eggs mibuntog sa San Remigio Aguilas, 73-60 sa pagpangulo ni Chad Go nga mihakot og 20 puntos.
Midaog sab ang defending champions Cebu Landmasters batok sa A-Team sa iskor nga 86-70 Si Franco Te maoy miwadwad og maayo alang sa Cebu Landmasters pinaagi sa iyang 27 puntos ug lima ka rebounds.