CEBU, Philippines - Duha pa ka teams ang mohimo sa ilang "debut" karong adlawa, ning higayona mao ang bugno sa duha ka dagkung iring dihang ang Cebu Institute of Technology-University (CIT-U) Wildcats makiglayog sa University of San Jose-Recoletos (USJ-R) Jaguars sa pagpadayon sa 13th Cebu Schools Athletic Foundation Inc. (CESAFI) basketball events diha sa Cebu Coliseum.
Sa dili pa magbugno ang Wildcats ug Jaguars sa alas-6:45 sa gabii, ang University of the Visayas (UV) Baby Lancers tinguha nga mokulit sa ilang ikaduhang sunod-sunod nga daog sa dihang sangkaon nila ang USJ-R Baby Jaguars sa opening nga gikatakda sa alas-5 sa hapon.
Sa kasamtangan, wala pa gyu'y nasayod kun unsa kalig-on ang Jaguars kay sila maoy nagbitay sa
kinailawmang bahin sa standings sa miaging CESAFI Partner's Cup, ang pre-season tournament sa liga tulo na ka bulan ang nilabay.
Niadtong higayona, napiangan ang Jaguars human sa ilang duha ka duwa tungod kay wala ang ilang
pointguard nga si Rendell Senining ug ang small forward nga si Fletcher Galvez nga nirepresentar sa Central Visayas alang sa Palarong Pambansa. Ang Central Visayas maoy kampiyon human nila pakurati ang National Capital Region (NCR).
Tungod niadto, wala na makabalik og duwa silang Senining ug Galvez kay sa lagda sa Partner’s Cup dili na tugotan si kinsang players nga moduwa og laing torneyo.
Sa pikas bahin, ang Wildcats miabante sa Partner's Cup finals, apan giharos sila sa mas lig-on nga Prime
Asia/UV Green Lancers sa ilang "best-of-three" series.
Apan sa labing unang higayon sud sa upat ka tuig, ang Wildcats moduwa nga wala ang ilang consistent scorer
nga si Allan Dimco, kinsa dili kwalipikadong makaduwa kay pakyas kini paghatag sa academic requirements nga gipangayo sa liga.
Hinuon, ang Wildcats aduna pay laing alas nga naglakip nilang Vincent Menguito ug ang masaarong rookie Joshua dela Cerna.
Sa habig sa Jaguars, magsalig kini nilang Rendell Senining ug Fletcher Galvez, uban nilang power forward Miguel Tabaloc, Wilkins Sanchez, James Regalado, Christian Senining ug sa managsuong Parker nga silang Matthew ug Christian. (BANAT PALARO)