CEBU, Philippines - Gipakita na usab ni multi-titled Cebuano rider Jon-Jon Adlawan ang iyang katakus aron maghari sa pro lite division sa 7th leg sa Kopiko Astig 3-in-one Supercross series sa miaging adlaw didto sa Cagayan De Oro City race track.
Si Adlawan nakasugat og hugot nga kompetisyon batok ni RP No. 1 rider Glenn Aguilar, apan wala kini makapiog kaniya ug mikadlit aron makuha ang ikaduha niyang sunod-sunod nga korona sa pro lite division.
Si Adlawan mao usab ang naghari sa maong dibisyon atol sa Tacloban City leg sa maong nationwide motocross series.
Si Burnok Mangosong mi-okupar sa ikatulong dapit, samtang ang laing Cebuano rider nga si Jubenile Abellar ug Dornak Yuson miangkon sa mosunod nga duha ka puwesto.
Pakyas hinuon si Adlawan paghimo og double-victory dihang mitugpa lang siya sa ikatulong dapit sa pro open division sunod ni Mangosong. Si Yuson mipuwesto sa ikaduhang dapit.
Si Glenn Lapuz maoy labing paspas sa open enduro category, samtang si Christian Morente maoy hawod sa local enduro. Si Jungle Cabuco maoy misakmit sa underbone title, samtang si Jannel Saulog sa women’s division.
Laing category winners naglakip nilang Glenn Gaid (peewee 50cc), BJ Pepito (peewee 65cc), McLean Aguilar (mini), Jordan Herrera (veterans C), Anthony Belican (veterans B) ug Michael Rivera (veterans A).
Ang Cebu-based nga Team Kopiko mao usab ang kampiyon sa Team Race category.