Player sa Letran nga si Dysam napusilan ug luwas na siya sa kuyaw nga kahimtang

Medyo naukay ang mga basketball fanatics dinhi sa Sugbo ilabi na gyud ang University of Southern Philippines Foundation diin kanhi nagduwa isip USPF Baby Panthers si Franz Dysam sa wala pa siya mobalhin ngadto sa Manila aron adto mopadayon sa iyang basketball career.

 Kagahapon, makapakurat nga balita ang miabot sa Sugbo dihang gikataho nga napusilan si Dysam kinsa nagduwa karon isip point guard sa Letran Knights.

Human sa ilang duwa kaniadtong Sabado din midaug sila batok sa Lyceum of the Philippines Pirates, 61-53.

Si Dysam kinsa lumad nga taga Palompon, Leyte taud-taud nga nahimong player ni kanhi Baby Panthers coach Camilo Go. Hinuon wala nato makuha-i og reaksyon si Go kay wala kita masayud sa iyang contact number.

Sa wala pa siya molarga padung sa Manila, nakaduwa una si Dysam sa CESAFI Partner's Cup ubos ni coach Raul Latonio, Sr. kinsa nagkanayon nga iyang mga higala ang mga ginikanan ni Dysam.

Samtang didto sa Manila, nakaduwa sab si Dysam sa Perpetual Altas sa wala pa siya mobalhin sa Letran.

Luwas na hinoon sa makuyaw nga kahimtang si Dysam karong mga gutloa human  siya pusila sa unom ka higayon samtang sulod sa iyang kotse didto sa San Juan nga maoy benyu sa NCAA games.

Apan walay swerte kay ang iyang asawa nga si Joan wala gyud masalbar ug mipanaw samtang gidala didto sa ospital.

Sumala pa sa mga sakop sa Letran community ubos sa ilang atheltic director nga si Fr. Vic Calvo nga ila nang gibalhin og laing ospital si Dysam alang sa security reasons kagahapon lang sa buntag. Gipahibalo kini pinaagi sa twitter account ni Fr.Vic (@LetranCollege.)

Aron pagseguro nga wala gyu'y makapasipala kaniya, dunay 24 oras nga nagbantay ni Dysam didto sa ospital ug walay gitogotan nga bisita gawas lang sa sakop sa iyang pamilya. 

Dunay duha ka police ug usa ka security detail nga maoy nagbantay kang Dysam. ilang gibalhin sa laing ospital si Dysam gikan sa UST ospital apan wala nila itug-an kung asa alang sa security reasons. Matod pa sa maong tweet ni Fr. Calvo  (@victorcalvo88) "Dyzam update: no visitors allowed. 2 police and 1 security detail. Transferred to another hosp#for security reasons."(@victorcalvo88)

Wala pa hiilhi kung kinsay nagpusil kanilang Dysam ug sa iyang asawa. Ang pagpamusil nahitabo didto sa eskina  N. Domingo St. ug sa Araneta Ave. pipila lang ka minutos human mobiya sa The Arena sa San Juan ang magti-ayon.

Naigo sa iyang dughan ug sa iyang paa si Dysam apan wala gihapon siya kawad-i og panimuot samtang gidala siya didto sa San Juan Medical Center.

Matod pa nga .45 kalibre ang gigamit sa pagpusil. Gikuha ang bala nga mitaup sa iyang dughan ug paa didto sa UST hospital.

Ang 24 anyos nga si Dysam wala moduwa dihang miabante ang Knights sa NCAA Finals sa miaging tuig ug karon lang tuiga mibalik og duwa sa Letran.

Duna na karo'y gitumbok nga suspetsado ang kapolisan nga dili pa nila mahimong itug-an.