Dimco 'disqualified', dili kaduwa sa 13th CESAFI season

CEBU, Philippines -  Usa sa mga "alas" sa Cebu Institute of Technology-University (CIT-U) Wildcats nga si Jose Allan Dimco ang diskwalipikado pagduwa sa 13th season sa Cebu Schools Athletic Foundation Inc. (CESAFI) kay pakyas kini pag comply  sa academic requirements nga kinahanglan sa liga.

 Si commissioner Felix 'Boy' O. Tiukinhoy Jr. miingon nga human sa ilang deliberasyon sa credentials sa  mga atleta, ilang nakita nga ang sinaligan sa CIT-U nga si Dimco, ang two-time CESAFI All-Star ug Slam Dunk artist wala

makakuha sa 60 porsiyento nga passing rate. Gumikan niini, dili siya angayan nga moduwa sa umaabot nga liga nga sugdan sa Agosto 3 diha sa Cebu Coliseum.

 Sa amended rules and regulations alang sa CESAFI 2012-2013 tournaments, Article A Section 1.6 stipulates that "a student athlete must get passing marks at least 60% of his/her academic units in the last two semesters before the

current school year. Subject/s withdrawn during these semesters is/are not included in the computation of the 60%. In the case where all the subjects of the semester were withdrawn, the semester cannot be counted as one of the last two semester."

 Matud pa ni Tiukinhoy nga gawas ni Dimco, ila usab nakita nga si Daryl Goloran sa defending champion

Southwestern University (SWU) Cobras wala sab makakuha sa susamang academic provision. Hinuon, sa kaso ni Goloran,  rebyuhon pa kini sa technical committee.

 Padayon usab nga naglutaw si Ervin Badrina pagduwa sa liga nga nalista sa line-up sa University of  Southern Philippines  Foundation (USPF) Panthers kay giingong kulang ang units nga gi-enroll atol sa first semester  sa school year 2011-2012, apan ipaubos kini   sa kompirmasyon sa AMA Computer College.

 Sumala pa ni Tiukinhoy nga ang concerned players gihatagan lamang hangtod ugma sa pagsumiter sa pertinent documents nga magpamatuod nga angay sila mopakita'g aksiyon karong tuiga sa Cebu's premier inter-school athletic league.

 Ang mga collegiate contenders nga walay problema kun "eligibility" sa ilang magduduwa ang hisgutan mao ang University of the Visayas (UV) Green Lancers, University of San Jose-Recoletos (USJ-R) Jaguars, University of San Carlos (USC) Warriors ug ang University of Cebu (UC) Webmasters.

 Apan dili pa kini garantiya nga makaduwa ang mga players kay moagi pa kini'g "mandatory drug testing" nga ipatuman sa CESAFI sa labing unang higayon sa tuyo nga mapreserbar ang limpiyong imahi ug pagprotiher sa integridad sa liga.