CEBU, Philippines - Human makuha nilang LeBron James, Dwyane Wade, Chris Bosh ug ilang mga kauban sa Miami Heat ang korona sa NBA ug ingon man kanilang team owner Micky Arison, team president Pat Riley ug head coach Erik Spoelstra — nagsaulog dayon sila sa usa ka nightclub didto sa Miami.
Midaug ang Heat batok sa San Antonio Spurs sa Game 7 sa NBA Finals, 95-88 ug dayag na lang nga ilang saulogon ang back-to-back championship celebration pinaagi sa saba, mabulokon ug ingon man champagne-popping spectacle.
Migasto ang Heat sa maong selebrasyon og 100 mil dolyares nga katunga lang sa ilang 200 mil dolyares nga gasto atol sa ilang kasaulogan dihang ilang gipukan ang Oklahoma City Thunder sa NBA Finals niadtong Hunyo sa miaging tuig.
Ang maong gasto maoy balor sa ilang napalit nga champagne.
Matod pa sa bar owner nga si David Grutman nga ang mga players mi-order og 100 ka botelya nga Dom Perignon ug tulo ka botelya sa 3-liter nga champagne.
Si Grutman nagkanayon nga ang iyang club mobaligya sa standard nga 750-mililiter sa Dom Perignon sa presyong 850 matag botelya ug sa 3-liter nga Jeroboams, sa tag 5,000 dolyares matag botelya.
"I'm not going to charge the Heat of the $100,000 value of comped alcohol," matod pa ni Grutman.