CEBU, Philippines - Nag-agi una'g kulba ang Friends of Stronghold Insurance quintet ni coach Romy Rama ug team owner Atty. Flor Yosores apan pabilin silang kalmado bisan pa sa hugot nga depensa sa Power Forty gikan sa Inayawan aron maka-ispot ngadto sa 98-94 nga kadauban ug misakmit sa korona sa Maning's Cup Inter-Ball Club basketball tournament kagahapon didto sa Talisay City Sports Complex.
Ang tulo ka free thows sa ilang point guard nga si Michael Veloso maoy nagselyado sa kadaugan sa Friends Stronghold apan sayo niana, duha ka three-pointers ni Rowel Sumalinog ug usa ka pinabandang tirada sa mas beteranong point guard maoy nag-inat sa iskor ngadto sa 94-83 sa nahibiling dos minutos sa duwa. Bisan pa sa 9-4 run sa Power Forty aron tapuson ang duwa, naka-ipsot lang gihapon ang Friends of Stronghold sa usa ka matam-is kaayong "come-from behind" nga kadaugan.
Ang Friends of Stronghold nabiyaan og 16 puntos sa sayong bahin sa duwa, 5-21 apan hinay-hinay nilang na-apas tungod sa ilang init kaayong outside shooting ug naibanan kini'g katunga dihang miposa og duha ka tres si Atty. Yosores, 20-28 human sa first period.
Laing init nga kamot ang mitabang aron mahingpit ang rally sa Friends of Stronghold dihang miburak og tulo ka triples si John Tantay aron hatagan sa labing unang labaw ang iyang team, 64-63.
Gikan niadto, kanunay nang sikit ang duwa sa duha ka kampo apan tataw nga kontrolado sa Friends of Stronghold ang duwa kay makahimo man sila usahay sa pag-inat bisan og maapsan sa Power Forty.
Nagsugod ang Friends of Stronghold pagkontrolar sa duwa human sa sagunson sayis puntos ni Alex Mercado, 85-79 sa tunga-tungang bahin sa fourth period aron tubson ang dili kaayo epektibo nga si Wewe Cabrera kinsa igo lang mihimo'g singko puntos.
Nakatabang sab sa ilang kadaugan si USJ-R Jaguar coach Edito Salacut kinsa miposa og 14 puntos. Usa ka laing big man nga si Efren Mosqueda wala makaduwa kay adunay piang sa wa'a niyang kamot.
Sa unang duwa, midaug ang Seijis World batok sa Eastern CJ Optical sa iskor, 99-86 aron sakmiton ang ikatulong pwesto.
Puntos matag duwa:
First Game:
Seijis World (99)— Angcon 37, Vernaiz 21, Bellamide 18, Abarquez 12, Belleza 7, Villa 2
CJ Optical (86)— Crisologo 29, Labuca 20, Capala 15, Vernaiz 10, Basalo 9, Utos 3.
Second game:
Friends of Stronghold (98)— Veloso 20, Salacut 14, Sumalinog 12, Mercado 11, Arias 9, Tantay 9, Yosores 6, Brago 6, Alcordo 5, Cabrera 5, Sanchez 2
Power Forty (94)— Abasolo 30, Alueta 13, Lim 10, Ebrado 8, Sumargo 7, Tabar 6, Canete 6, Misa 5, Dela Rama 4, Bughao 4, Ozon 1. Halftime: 56-49. (BANAT PALARO)