CEBU, Philippines - Sa labing unang higayon sa torneyo, migamit og all-local players ang Prime Asia Lending Corp.-UV kinsa misanong sa kamandoan ni coach Felix Belano ug wala gihapo'y kalainan sa resulta sa duwa tungod kay mikulit sila'g 85-67 nga kadaugan batok sa San Marino tuna-CIT-U aron haruson ang best-of-three finals alang sa ilang grandslam title sa Enervon CESAFI Partner's Cup 2013 basketball tournament kagabii didto sa Cebu Coliseum.
Sa Game 1 niadtong Huwebes, midaug sab sa Game 1 ang Prime Asia sa iskor, 91-83 ug sa maong otso puntos nga kadaugan, miduwa ang duha ka Cameroonian imports nga silang Steve Cedrick Akomo ug Mike Harry Nezenssue.
Gikan sa 15-all nga tabla human sa first quarter, na-outscore sa Prime Asia ang San Marino sa second period, 26-10 aron moposte'g 41-25 nga abante sa halftime.
Dili unta imposible alang sa San Marino ang paglusad og mainitong rally apan kanunay gyud adunay tubag ang Prime Asia sa panahon nga buot na silang mosikit. Gawas nga daghan kaayo'g hinagiban ang Prime Asia gikan sa three-point field shooting ug fastbreaks, mas nakabentaha sab sila sa rebounds tungod nilang Wowie Escocio ug Chris Perolino.
Dihay usa ka higayon nga nabiyaan na lang og 10 puntos ang San Marino apan dili gyud sila makadikit og maayo ilabi na kay wala mag-igo si Vincent Menguito ug Joshua dela Cerna kung kanus-a nga gikinahanglan og maayo ang ilang produksiyon.
Mihimo'g double figures silang Floyd Taboada ug Allan Dimco apan wala kini makahatag og dakong epekto ngadto sa Prime Asia.
Si Perolino kinsa usa sa nahimong sakop sa Mythical Five maoy nangu sa Prime Asia sa iyang 19 puntos.
Silang Escocio ug Angelo Babia midugang og 12 ug 11 puntos alang sa Prime Asia samtang si Taboada may 11 puntos alang sa San Marino ug silang Dimco ug Clyvin Lima-lima parehong miamot og 10 puntos.
Ang gamitoy nga point guard sa Prime Asia nga si John Michael Abad maong napiling MVP. Kauban niya sa Mythical Five mao ang teammates nga silang Perolino ug Escocio ug silang Dimco ug Menguito sa habig sa San Marino.
Puntos matag usa:
Prime Asia (85) – Perolino 19, Escocio 12, Babia 11, Abad 7, Mendoza 7, Codilla 7, Octobre 6, Cabanero 6, Marquez 5, Fajardo 5
San Marino (67) – Taboada 11, Dimco 10, Limalima 10, Dela Cerna 8, Batiquin 7, Tabalin 6, Bucao 5, Brigoli 3, Pono 3, Menguito 2, Graf 2. Halftime: 41-25. (BANAT PALARO)